ОХУ-ын Ерөнхийлөгч Владимир Путины “ордон” гэх тодотголтой Хар тэнгисийн эрэг дэх Геледжник хот дахь хэт тансаг сууц хамгийн анх 2010 онд олны анхаарлын төвд орсон. Төрийн мэдлийн компаниудад огт хийж гүйцэтгээгүй ажлын нэр барин завшсан мөнгөөр нэг тэрбум долларын барилгын зардалтай, итали маягийн ордонг Авлигатай тэмцэх сан, Проект төслийнхөн 2014 оноос эхлэн шалгаж, дотоод зохион байгуулалтыг нь харуулсан нууц бичлэгээрээ баримтат кино хийж, дэлхий даяар цацаж байсан билээ. Дараа нь буюу 2021 онд Алексей Навальный уг хэл ам дагуулсан ордонд шалгалт хийж, тэр талаараа тайлагнаж байсан бол Авлигатай тэмцэх сан, Проект төслийнхөн саяхан шинэ бичлэг задруулж, тайлан тавьсан байна.

Авлигатай тэмцэх сангийнхны тодорхойлсноор “Зоригт ажилтан” нь В.Путиний ордонд нэвтэрч нэгжлэх хийх үедээ нууцаар дөрвөн цагийн бичлэг хийжээ. Тус сангийнхны тайланд дурдсанаар өмнө нь унтлагын өрөөнүүд байсан тасалгаанууд нь одоогийн байдлаар зочид буудал мэт тансаг, хоолны өрөө байсан тасалгаанууд нь зоогийн газар мэт дээд зэрэглэлтэй болж, улам л тансаг чамин болсон байна. Мөн ордон доторх ханануудад олон тооны уянгын сэдэвтэй уран зураг байсан бол өнөөгийн байдлаар 1812 оны Бородиногийн тулаан, 1242 оны Мөсөн дээрх тулаан зэрэг түүхэн үйл явдалыг дүрсэлсэн, Оросын алдарт уран зураач Павел Нахимов, Фёдор Ушаков нарын томоохон хэмжээтэй уран зургуудаар сольж тавьсан байна.

Авлигатай тэмцэх сан, Проект төслийнхний шалгалтын явцад В.Путиний ордонгийн зарим хэсгийг жилээр түрээсэлсэн хоёр удаагийн тохиолдол илэрсэн бөгөөд үүний төлбөрт нийт 7.6 сая долларыг шилжүүлсэн гуйвуулгын баримтыг ч олсон гэв.

Хэрэв 2021 онд гарсан В.Путиний тансаг ордонг харуулсан баримтат киног үзэхийг хүсвэл доорх холбоосоор хандаж болох аж. 
https://www.youtube.com/watch?v=TL0dSaqhfVs