Эрүүл мэндийн сайд Ж.Чинбүрэн болон ДЭМБ-ын суурин төлөөлөгч Др Сокорро Эскаланте, Эм, эмнэлгийн хэрэгслийн хяналт, зохицуулалтын газрын албан үүргийг түр орлон гүйцэтгэгч П.Алтанцэцэг, ХӨСҮТ-ийн захирал С.Энхболд нар өнөөдөр Монголын Эмийн чанарын хяналтын Үндэсний лавлагаа лабораторийн барилгын ажлын явцтай танилцлаа.

Эмийн чанарын хяналтын Үндэсний лавлагаа лаборатори байгуулах барилгын ажил өнгөрсөн оны аравдугаар сараас эхэлсэн бөгөөд барилга угсралт, засвар шинэчлэлийн ажил төлөвлөсөн хугацаандаа бүрэн дууслаа.

Үргэлжлүүлэн тавилга, тоног төхөөрөмжийн угсралт, нүүлгэлтийн ажил хийгдэх юм.

Нийт 884 м.кв талбайд батлагдсан зураг төслийн дагуу хийгдсэн тус лабораторийн барилга нь админ буюу оффис, биологийн лаборатори, химийн лаборатори гэсэн гурван хэсгээс бүрдэх ба лабораторийн дөрвөн төрлийн газ, галын дохиоллын систем, хийгээр унтраах систем, агааржуулалт, хөргөлтийн систем, нэрмэл усны систем, холбоо дохиолол, камерын хяналт, зарлан мэдээлэх систем зэрэг инженерийн шугам сүлжээний олон системтэй болохыг Барилга угсралтын ажлыг гүйцэтгэсэн М-Си-Эс Пропери ХХК-ийн төслийн менежер Ч.Амарбаясгалан онцлон танилцуулав.

Энэхүү лабораторийг ДЭМБ-ын 1.8 сая ам.долларын хөрөнгө оруулалтаар шинэчилж байгаа ба барилгын зураг төсөл, угсралтын ажлын тендер, тавилга, багаж тоног төхөөрөмж нийлүүлэх бүх ажлыг ДЭМБ хариуцан зохион байгуулж байгаа юм. Тодруулбал, Олон улсын стандартад нийцсэн Эмийн чанарын хяналтын Үндэсний лабораторид шаардлагатай 45 нэрийн 78 төрлийн багаж тоног төхөөрөмж, туслах хэрэгсэл нийлүүлж, ажилтнуудыг чадавхжуулах сургалт явуулна.

Эм шинжлэх лаборатори нь одоогийн байдлаар жилдээ 2000-2500 дээж шинжилж байгаа бөгөөд шинжилгээний хүлээгдлийн хугацаа 90-100 хоног байгаа бол Эмийн чанарын хяналтын Үндэсний лавлагаа лаборатори болж статус нь шинэчлэгдэн томорсноор үйл ажиллагааны хүчин чадал нь 2-3 дахин нэмэгдэж, хүлээгдэлгүйгээр эмийг шинжлэх нөхцөл бүрдэнэ. Өөрөөр хэлбэл манай улс эмийн чанарын асуудлыг хяналтдаа бүрэн оруулах Үндэсний лавлагаа лабораторитой болж байна.

Тавилга угсралт, нүүлгэлтийн ажил хийгдэх хугацаа болон тухайн хугацаанд шинжилгээний тасралтгүй байдлыг ханган ажиллах тал дээр Эм, эмнэлгийн хэрэгслийн хяналт, зохицуулалтын газраас нарийн төлөвлөгөө гарган бэлтгэл ажлыг ханган ажиллаж байна.