Евразийн эдийн засгийн холбооны ээлжит уулзалтаар Монгол Улстай байгуулах худалдааны хэлэлцээг албан ёсоор эхлүүлнэ гэдгийг ОХУ-ын Ерөнхийлөгчийн зөвлөх Юрий Ушаков “ТАСС” агентлагт мэдээлжээ. Евразийн эдийн засгийн холбооны дээд хэмжээний уулзалт энэ сарын 08-ны өдөр Москва хотноо эхлэх бөгөөд гишүүн орнуудын өндөр дээд албан тушаалтнууд оролцоно. Энэ удаагийн дээд хэмжээний уулзалт өргөтгөсөн чуулган болон ганцаарчилсан болон хамтарсан уулзалт гэсэн хоёр хэсэгт хуваагдах юм байна.

ОХУ-ын Ерөнхийлөгчийн зөвлөх Юрий Ушаков хэлэхдээ “Өргөтгөсөн хуралдааны үеэр гишүүн улс орнууд хэлэлцээрт гарын үсэг зурна. Тэр дундаа Монгол Улстай худалдааны хэлэлцээг эхлүүлэх баримт бичгийг батална” гэсэн байна.

Түүнчлэн гишүүн орнууд Евразийн эдийн засгийн гишүүн орнуудын өнгөрсөн жилийн тайлан, хамтын ажиллагааны үр дүн, цаашдын чиг хандлагын талаар хэлэлцэх юм. Энэ жил Евразийн эдийн засгийн холбооны 10 жилийн ой тохиож байна. Тус холбоог хуучин Зөвлөлтийн бүрэлдэхүүнд багтаж байсан улс орнууд эдийн засгийн уналтаас сэргийлэхийн тулд, хамтын ажиллагааг өргөжүүлэх үүднээс 1994 онд байгуулахаар тохиролцож, 2014 онд албан ёсоор байгуулах гэрээнд гишүүн орнууд гарын үсэг зурсан билээ. Одоогийн байдлаар тус холбоонд Армени, Беларус, Казахстан, Киргизстан, Орос гэсэн таван улс бүрэн эрхт гишүүн, Куба, Молдав, Узбекистан улсууд ажиглагчийн статустай байна.

Гишүүн орнууд өөр хоорондоо худалдааны олон талт болон хоёр талт худалдааны хэлэлцээг хэрэгжүүлж байна. Гэхдээ Хятад, Вьетнам, Серби, Сингапур улсуудтай 2015-2021 оны хооронд чөлөөт худалдааны хэлэлцээр байгуулан харилцаж байгаа юм. Одоогоор Монгол Улс тус байгууллагын гишүүн орнуудтай ямар нэгэн хэлэлцээ байгуулаагүй байна. Гэхдээ 2014 онд Монгол, Орос, Хятад гурван улсын эдийн засгийн коридор байгуулахаар болж гурван улсын 30 гаруй төсөл хөтөлбөрийг хэрэгжүүлэхээр болж байсан юм. Түүнчлэн байгалийн хийн хоолой болон өөр бусад төсөл хөтөлбөрийг хэрэгжүүлэхийн тулд худалдааны хэлэлцээ байгуулах ёстой гэдгийг хоёр хөршийн өндөр албан тушаалтнууд удаа дараа мэдэгдэж байсан билээ.