Өмнөговьчуудыг УИХ-д төлөөлж буй хоёр гишүүн төдийгүй, тус аймгийн АН болон МАН-ын хорооны дарга нар нүүрсний хулгайн хэргээр АТГ-ын хаалга татаад удаж байна. АТГ-аас хийсэн шалгалтын дүнд Д.Бат-Эрдэнэ, Н.Наранбаатар нарыг УИХ-ын гишүүн эгүүлэн татах асуудлыг прокурорт хүргүүлээд буй. Тэднийг мөрдөн шалгах ажиллагааны явцад УИХ-ын гишүүний халдашгүй бүрэн эрх нь саад болж байгаа гэж үзсэн. УИХ-ын гишүүн Д.Бат-Эрдэнийн “Ажнай корпорац” oрон нутгийн жижиг “Тавантолгой” ХК-д томоохон хувьцаа эзэмшдэг. Мөн “Тавантолгой транс” компаниар дамжуулан нүүрс дамлаж, тээвэрлэдэг гэх мэдээлэл олон жилийн нүүрийг үзэж байна. Тэгвэл Өмнөговь аймгийн МАН-аас УИХ-д сонгогдсон Н.Наранбаатар, АН-аас тус аймгийн Засаг дарга болсон Р.Сэддорж нар орон нутгийн өмчит “Тавантолгой” ХК-ийг Д.Бат-Эрдэнийн дэмжлэгээр ээлжлэн удирдаж байсан албан тушаалтнууд учраас нүүрсний хэрэгт шууд холбогддог. Өөрөөр хэлбэл, Д.Бат-Эрдэнэ, Н.Наранбаатар, Р.Сэддорж нар Тавантолгойн ордоос алдагдсан гэх 268 мянган тонн нүүрсний хэрэгт тайлбар өгөх ёстой голлох хүмүүс. Харин Өмнөговийн МАН-ын дарга Х.Мандахбаяр хувьд АТГ-аас анх нүүрсний хэрэгт нэр холбогдсон 17 албан тушаалтны жагсаалтад нэр нь багтсан. Х.Мандахбаярын “Их шижир баялаг” ХХК жижиг “Тавантолгой” компанийн уурхайд олон тэрбумын өртөгтэй хөрс хуулалтын ажил гүйцэтгэж ирсэн. Түүнийг 2020 онд тус аймгийн МАН-ын дэд даргаар ажиллаж байхдаа АН-ын “Ажнай” Д.Бат-Эрдэнэтэй улс төрийн тохироогоор хуйвалдаж, аймгийн ИТХ-ын 4 бүлэглэл намын санхүүжилт нэрээр тус бүрдээ 500 тонн нүүрсний квот авсан гэдэг мэдээлэл гарч байлаа. Нэг квот нь Х.Мандахбаярынх гэдэг бөгөөд тонн нүүрс тутмаас гурван ам.доллар унагасан талаар эх сурвалж мэдээлж байгаа юм.  Үүнээс гадна өнөөг хүртэл Тавантолгойд явж байгаа нүүрс тээврийн 2-3 компанийн нэр яригддаг. Ийнхүү  АТГ-аас зарласан говийн МАНАН буюу орон нутгийн нүүрсний мафийн толгойлогчид болох дээрх  дөрвөн хүн бүгд “Тавантолгой” ХК-ийн мэдлийн уурхайд ямар нэг байдлаар гар дүрсэн гэдгийг хууль хяналтын байгууллагууд тогтоогоод байгаа. Улмаар Засгийн газар нүүрсний хулгайчидтай тэмцэх кампанит ажлынхаа хүрээнд жижиг “Тавантолгой” ХК-д Бүрэн эрхэт төлөөлөгч (БЭТ) томилсон. БЭТ томилсны дүнд “Тавантолгой” ХК хувьцаа эзэмшигчдэдээ түүхэндээ байгаагүй өндөр дүн буюу 144 тэрбум төгрөгийн ногдол ашиг хуваарилахаар болоод байгаа. Ерөнхий сайд Л.Оюун-Эрдэнээс өгсөн чиглэлийн дагуу нүүрсний хэргийг хууль хяналтын гурван байгууллагын хамтарсан Ажлын хэсэг гарч ажиллаж эхэлсэн. Ажлын хэсгийн өгсөн мэдээллээр,  Тавантолгойн бүлэг ордод лиценз эзэмшиж буй “Эрдэнэс Тавантолгой” ХК болон орон нутгийн өмчит “Тавантолгой” ХК-д  өнгөрсөн 10 гаруй жилийн хугацаанд гарсан нүүрсний хулгайг цогцоор нь шалгаж байгаа аж.