Сүүлийн үед эрч нь суларсан эдийн засгийг улам хөгжүүлэх зорилгоор гаргахаар төлөвлөсөн нийт нэг ихнаяд юань буюу 138 тэрбум ам.долларын үнэлгээ бүхий 30 жилийн хугацаатай гадаад бондын эхний багцыг энэ сарын 17-ны өдөр гаргахаар болсон талаар БНХАУ-ын Сангийн яамнаас өнөөдөр мэдээлэв. Тус өдөр урт хугацаатай бондын эхний багц болох 40 тэрбум юань буюу 5.5 тэрбум ам.долларын бонд гаргахаар төлөвлөжээ. Бээжин хэт урт хугацаатай бонд гаргах гэж буйгаа өнгөрсөн гуравдугаар сард анх мэдээлж байсан билээ. БНХАУ-ын Ерөнхий сайд Ли Чиан тухайн үед хэлэхдээ “бондын мөнгийг дотоодын стратеги хэрэгжүүлэх, голлох бүс нутгуудад аюулгүй байдлын чадамжийг бий болгох чиглэлээр ашиглана” гэж байлаа. БНХАУ-ын Засгийн газар 2020 оноос хойш анх удаа, сүүлийн 26 жилд дөрөв дэх удаа урт хугацаатай бонд гаргаж байгаа нь энэ юм. Хэдийгээр Хятадын зах зээл томоороо дэлхийд хоёрдугаарт ордог ч цар тахлын үеэс хойш бодлого боловсруулагчид дифляци болон эдийн засгийн зогсонги байдалтай тэмцсээр байгаа билээ.