“Монголын алт” (МАК) ХХК Дундговь аймгийн Баянжаргалан суманд 300 МВт-ын хүчин чадалтай цахилгаан станц байгуулахаар өнөөдөр (2026.07.03) шав тавилаа. Энэхүү ёслолд Эрчим хүчний яамны төлөөллүүд оролцлоо. 

Хөөтийн уурхайг түшиглэн байгуулах эл цахилгаан станц нь дээрх компанийн хэрэгжүүлж буй нүүрсэнд түшиглэсэн эрчим хүчний анхны төсөл юм. Тус цахилгаан станцад үйлдвэрлэх эрчим хүчний 38 хувиар “Цагаан суварга” төслийн хэрэглээг хангах бол 62 орчим хувийг нь эрчим хүчний нэгдсэн сүлжээнд нийлүүлэн, импортыг бууруулахаар тооцож буй. Станц орчин үеийн дэвшилтэт технологитой, байгаль орчинд ээлтэй байна гэдгийг төсөл хэрэгжүүлэгчид онцоллоо. Тухайлбал, агаарт ялгаруулах тоосонцор, хорт хийн хэмжээ Европын Холбооны EU 2010/75 шинэ цахилгаан станцын стандартыг хангах юм. Мөн ус зарцуулалт бага, шаталтын явцад үүсэх дэгдэмхий үнсийг дэвшилтэт уутат шүүлтүүрийн системээр 99 хувь шүүн нөөцөлж, “МАК Евро Цемент”, “МАК Конкрит” бетон зуурмагийн үйлдвэрт түүхий эд болгон нийлүүлэх нь. 

Станцын барилга угсралтын ажлыг энэ онд эхлүүлж, эхний блокийг нь 2028 оны дөрөв, хоёрдугаар блокийг нь 2029 оны нэгдүгээр улиралд ашиглалтад оруулахаар төлөвлөжээ. Эл станцыг байгуулснаар орон нутагт 300 орчим байнгын ажлын байр бий болох бөгөөд МАК компани ажилтнууддаа тогтвортой хөдөлмөрлөж, амьдрах таатай орчин бүрдүүлэхийн тулд Баянжаргалан суманд суурьшлын бүс байгуулахаар төлөвлөж буй аж.