ЭМЯ-ны Төрийн нарийн бичгийн даргын орон тоо одоо ч түр орлон гүйцэтгэгчтэй буюу онгорхой байгаа. Тэгвэл тус албан тушаалд очих хамгийн магадлал өндөртэй байгаа нь Д.Очирбат, Б.Бямбадорж хоёр аж.

Д.Очирбатын хувьд Чингэлтэй дүүргийн ЗДТГ-т Эрүүл мэнд хариуцсан зохион байгуулагч, тус дүүргийн Засаг даргын орлогч, Засаг дарга, УИХ-ын гишүүнээр ажиллаж байсан. Харин 2016 онд Ж.Эрдэнэбатын Засгийн газар байгуулагдахад ЭМЯ-ны Төрийн нарийн бичгийн даргаар томилогдож байв. Гэвч 2018 оны нэгдүгээр сарын 10-ны өдөр Засгийн газрын хуралдаанаар үүрэгт ажлаас нь чөлөөлж байсан юм. Ингэхдээ оргүй хоосон хоцроогүй. Улсын Нэгдүгээр төв эмнэлгийн даргаар очсон байдаг. Харамсалтай нь, тус эмнэлэгт зүрхний хавхлага солих, таславчийн цоорхой нөхөх хагалгааны улмаас 30-65 насны хоёр хүн амь насаа алдсан, 35 настай иргэн хоолойн мах авхуулах хагалгаанд орж нас барсан. Тухайн үед эмнэлгийн удирдлагууд эмч, мэргэжилтнүүдийн буруугаас хүний амь нас эрсдэж байна гэж мэдээлэл хийж байсан боловч чухам дээрх асуудлуудтай холбоотойгоор Д.Очирбатыг эмнэлгийн даргын албан тушаалаас нь чөлөөлж байлаа.

Д.Очирбатын хувьд өөрийг нь ЭМЯ-ны ТНБД-ын албан тушаалаас хууль бусаар чөлөөлсөн гэж үзэн шүүхэд хандаж гурван шатны шүүхээр явж түүний талд шийдвэр гарчээ. Тэгвэл өнгөрсөн гуравдугаар сард шүүхийн шийдвэр албадан гүйцэтгэх тогтоол гарчихаад байгаа юм байна. Нэг талаас шүүхийн шийдвэртэй, нөгөө талаас бас нам дээрээ дэмжлэгтэй хэмээн ЭМЯ-ны Төрийн нарийн бичгийн дарга болох болзолоо хангачихаад явж байгаа аж.

Харин Б.Бямбадоржийн хувьд Нийслэлийн Эрүүл мэндийн газрын даргын албан тушаалаас сарын өмнө чөлөөлөгдөөд байгаа. ЭМЯ-ны ТНБД-ын албан тушаалд очих талаар яриа эртнээс гарсан. Одоо бол бүр идэвхтэй байгаа гэнэ. Учир нь тэрбээр Эрүүл мэндийн сайд С.Чинзоригтой нэг нутгийн буюу Өвөрхангай аймгаас гаралтай хүн. Гэвч өнгөрсөн хэдэн жил түүнийг тойрсон элдэв хэл ам тасраагүй гэхэд болно. Албан тушаалаасаа чөлөөлөгдсөн шалтгааныг нь ч түүнтэй холбодог. Цар тахлын үед өөрийн хувийн ШИНОНМЕД эмнэлгээрээ дамжуулан ковидын ор дэлгэж олон тэрбумаар хэмжигдэх санхүүжилт авсан. Эрүүл мэндийн салбарт халаа сэлгээ олныг хийсэн. Дүүргүүдийн эмнэлгийн дарга нарыг сольсон, албан тушаалтайгаа зууралдсан гээд яривал урт түүх бий. Гол нь цар тахлаас шалтгаалан улс даяараа онцгой нөхцөлд амьдарч байсан цаг хугацаанд ийнхүү ажлын хийдэл, ашиг хонжоо харсан үйлдэл олныг хийсэнд нь олон нийт дургүй байгаа юм.

Ийм л хоёр хүн Эрүүл мэндийн яамны Төрийн нарийн бичгийн дарга болохоор уралдаж эхэлжээ. Салбартаа нэр хүнд муутай хэмээх хоёр хүний нэгийг ЭМЯ-ны Төрийн нарийн бичгийн дарга болгохоор зэхэж байгаад салбарын эмч, мэргэжилтнүүд нэлээд дургүй байгаа аж.