Хэт халуун цай, кофег тогтмол уух нь улаан хоолойн хорт хавдар тусах эрсдэлийг гурав дахин нэмэгдүүлж болзошгүй ажээ.  Халуун ундаа нь Европ даяар хамгийн өргөн хэрэглэгддэг ундааны төрөлд багтдаг бөгөөд 2023 оны байдлаар тус тивийн нэг иргэн дунджаар 5.7 кг кофе хэрэглэж байна. "International Journal of Cancer" сэтгүүлд нийтлэгдсэн судалгаагаар Их Британид амьдардаг дунд насны сая орчим эрэгтэй, эмэгтэй хүмүүсийн дунд 14 жилийн турш явуулж, ундаагаа "маш халуун" (Олон улсын хорт хавдар судлалын агентлагаас Цельсийн 65 болон түүнээс дээш хэмтэй гэж тодорхойлсон) байдлаар уудаг хүмүүс "бүлээн" ундаа уудаг хүмүүстэй харьцуулахад улаан хоолойн хорт хавдраар өвчлөх эрсдэл бараг гурав дахин өндөр болох нь тогтоогджээ.
Хэрэглэсэн хэмжээ ч мөн чухал нөлөөтэй бөгөөд өдөрт зургаа ба түүнээс дээш удаа халуун уух юм уух нь эрсдэлийг нэмэгдүүлдэг байна. Оксфордын их сургуулийн Хүн амын эрүүл мэндийн тэнхимийн хоол тэжээлийн чиглэлийн эпидемиологич, уг судалгааг хамтран зохиогч Керен Папиер “Euronews Health”-д өгсөн ярилцлагадаа "Энэхүү өргөн хүрээтэй судалгаа нь халуун болон маш халуун ундаа уух нь хавтгай эсийн карцинома [арьсны эсийн ургалтаас үүсдэг хорт хавдрын нэг төрөл] үүсэх эрсдэлийг нэмэгдүүлдэг гэдгийг батлах нотолгоог улам бүр нэмэгдүүлж байна" гэжээ. Ихэнх хүмүүс кофе, цайгаа Цельсийн 50-60 хэмийн халуунтай үед уудаг ч энэ нь бүс нутаг болон бэлтгэх аргаас хамааран харилцан адилгүй байж болно. Папиер "Хэрэв ундааг уухад таагүй мэдрэмж төрж байвал түүнийг хэсэг хугацаанд байлгаж, 'маш халуун' биш, харин 'бүлээн' эсвэл 'халуун' гэж хэлж болохуйц хэмжээнд хүртэл хөргөх хэрэгтэй " гэжээ.

Улаан хоолойн хорт хавдар нь хавдар үүссэн байршлаас хамааран хавтгай хучуур эдийн гаралтай хорт хавдар (squamous cell carcinoma) болон аденокарцинома гэсэн үндсэн хоёр хэлбэрт хуваагддаг.

"Cancer Research UK" байгууллагын мэдээлснээр, Их Британид уг өвчний тохиолдол харьцангуй өндөр буюу тус улсад хамгийн түгээмэл тохиолддог хорт хавдрын жагсаалтын 14-т бичигддэг байна. Гэвч судалгаагаар холбоо хамааралтай болох нь тогтоогдсон хавтгай хучуур эдийн гаралтай улаан хоолойн хорт хавдрын хэлбэр нь харьцангуй ховор тохиолддог хэвээр байна. Мөн "Cancer Research" байгууллагаас улаан хоолойн хорт хавдар үүсэхэд нөлөөлдөг амьдралын хэв маягтай холбоотой гол эрсдэлт хүчин зүйлсэд тамхи татах, архи хэрэглэх, түүнчлэн таргалалт зэрэг багтсаар байгааг тэмдэглэжээ.