БНХАУ Номхон далайн баруун хэсэгт алт, мөнгөөр ​​нэн баялаг, асар том хэмжээний далайн доорх ашигт малтмалын орд илрүүлснээ мэдэгдэв. Баасан гарагт төрийн мэдлийн CCTV телевизийн мэдээлснээр, уг нээлтийг Хятадын хэд хэдэн эрдэм шинжилгээний байгууллагын хамтарсан экспедицийн явцад хийжээ. Далайн ёроолоос эрдэс бодисоор баялаг халуун ус оргилон гардаг бүс буюу "гидротермаль талбар"-т байрлах эдгээр хүдэр нь үнэт металлын агууламж маш өндөртэй аж. Тухайлбал, мөнгөний агууламж хамгийн өндөр буюу нэг тонн хүдэрт 1 кг-аас (2.2 фунт) давж байгаа бол металлын дундаж агууламж нь хуурай газрын ердийн ордуудынхаас илүү байна.

Судалгааны багт Цинхуа их сургуулийн Далайн инженерийн хүрээлэнгийн дэд захирал Сүн Шижи, Циндаогийн Далайн геологийн хүрээлэн болон Шанхайн Жиао Тонг их сургуулийн судлаачид багтжээ. Экспедиц наймдугаар сарын 10-нд Шэньжэн хотоос Хятад улсад анх удаа дотооддоо загварыг нь гаргаж, үйлдвэрлэсэн далай судлалын аварга том хөлөг онгоцнуудын нэг болох "Сян Ян Хун 10" (Xiang Yang Hong 10)-оор аяллаа эхлүүлсэн байна. Үнэт металлуудыг өндөр температуртай, өргөн уудам гидротермаль талбараас илрүүлсэн бөгөөд тэдгээр нь "гидротермаль сульфид"-ын хүдэрт төвлөрсөн байдалтай  аж.

Эдгээр олон төрлийн металл агуулсан орд нь далайн ёроолоос металл ихтэй, маш халуун ус оргилон гарч, хөлдөх шахам хүйтэн далайн устай мөргөлдөх үед үүсдэг байна. Гэнэтийн хөргөлтийн улмаас металлууд хүхэртэй нэгдэж, хатуу сульфидын эрдэс бодис болон тунадасждаг. Үүнд,  ихэвчлэн зэс, цайр, хар тугалга багтах боловч алт, мөнгө ч мөн агуулагддаг байна. Хятадын зүүн хэсгийн Циндао хотын далайн судлаачдын 2016 онд "Жилин Их Сургуулийн Сэтгүүл"-д (Journal of Jilin University) нийтлүүлсэн судалгааны өгүүлэлд дурдсанаар, гидротермаль талбайнууд нь Номхон далайн баруун хэсгийн ихээхэн хэсгийг хамарч, Японы хойд хэсэгт орших Курилын арлуудаас эхлээд Шинэ Зеландын зүүн хойд хэсгийн ус хүртэл үргэлжилдэг байна. Судалгааны баг аялалд гарахаасаа өмнө тухайн бүс нутагт арав гаруй удаагийн урьдчилсан судалгаа хийжээ.

CCTV-ийн мэдээлснээр, өмнөх судалгаануудаар далайн мандлаас доош 700-1500 метрийн гүнд, шингэний температур нь Цельсийн 315 хэмээс (Фаренгейтийн 599 хэм) давсан өндөр температуртай олон арван гидротермаль цооног илрүүлсэн байна. Өмнөх судалгааны үр дүнд тулгуурлан тус баг уг сав газраас "шинэ бөгөөд маш том" гидротермаль олборлолтын бүсийг нарийвчлан тогтоожээ. Энд илэрсэн орд газар нь конус хэлбэртэй, сульфидын асар том гурван овоолгоос бүрддэг байна. Лабораторийн урьдчилсан шинжилгээгээр уг хүдрийн биет нь ихэвчлэн халькопирит, пирит, сфалерит зэрэг эдийн засгийн ач холбогдол бүхий эрдэс бодисоос бүрддэг болохыг тогтоожээ. CCTV-ийн мэдээлснээр, алт, мөнгөний агууламж нь хуурай газрын орд газруудтай харьцуулахад мэдэгдэхүйц өндөр байна. Алтны агууламж нэг тонн хүдэрт 15.4 грамм (ойролцоогоор 0.5 трой унц) хүрдэг бол мөнгөний агууламж нэг тонн хүдэрт дээд тал нь 1.27 кг-д хүрч байна.

Мөн Сүн (Song) хэмээх судлаач уг идэвхтэй талбайд далайн гүний нөхцөлд дасан зохицсон өвөрмөц биологийн бүлгэмдлүүд оршдог бөгөөд энэ нь эрс тэс орчинд амьдрал хэрхэн оршин тогтнодог талаар шинжлэх ухааны чухал мэдээлэл өгдөг болохыг онцолжээ.