АН-ын дотоодод уур амьсгал нэлээд ширүүн байгаа аж. Учир нь намын дарга Л.Гантөмөр гишүүдийнхээ хүлээлтэд хүртэл ажиллаж чадахгүй байна гэсэн шүүмжлэл өнгөрсөн хугацаанд ихээр гарсан. Үүн дээр нэмэгдээд БСШУ-ы сайдаар ажиллаж байх үеийнх нь Боловсролын зээлийн сантай холбоотой асуудал үүссэн нь ч нэрмээс болж байгаа аж. Энэ бүхэнд төв намаас дорвитой хариулт өгөхгүй байгаад гишүүд нь бухимдаж эхэлжээ. Хэдийгээр хуваагдал хагацал нь нэг талдаа гарч, нэг тамгатай, нэг нам болсон болохоор “гарман дээр морио юүлэхгүй” гэж гүрийсэн ч эцэстээ асуудал босгохоос өөр аргагүйд хүрч байгаа бололтой. Ирэх жилийн УИХ-ын сонгууль холимог хувилбараар болох бол намын жагсаалтаа дарга нь тэргүүлэх учиртай. Энэ ч дангаараа том асуулт.

Тиймээс Л.Гантөмөрийг намын даргаас нь буулгах тухай яриа сэдэрч эхэлсэн байна. Бүгдийн мэдэж байгаагаар энэ оны нэгдүгээр сарын 19-ний өдөр АН-ын Үндэсний бодлогын хорооны хуралдаанд Л.Гантөмөр 152 гишүүний санал авч АН-ын дарга болсон. Түүний өрсөлдөгч С.Баярцогт 129, З.Нарантуяа 12 саналаар удаалж байв. Тухайн үед Ерөнхийлөгч асан Х.Баттулгын гэгдэх ҮБХ-ны 30 гаруй гишүүн бөөнөөрөө Л.Гантөмөрт саналаа өгснөөр ялалт байгуулахад ихээхэн нөлөөлөв гэдэг мэдээлэл гарч байлаа. Ер нь дундын хүн хэлбэрээр талцаж хуваагдсан бүлэглэлүүд түүнийг даргаар тавьсан гэдэг ч тэр дундаа Х.Баттулга гэдэг хүний нөлөө харьцангуй өндөр байжээ гэсэн үг.

АН-ын удирдах албан тушаалуудад Х.Баттулгын нэр дээр данслагддаг хүн олноор орж ирсэн тухай мэдээлэл бий. Тэгвэл АН Их хурлаа хийхээр хүлээж байгаа энэ үед даргын асуудал босож ирвэл хэн байх вэ гэдэгт ч хариулт бэлэн болжээ. Мэдээж, нэгдүгээрт Х.Баттулга намын ҮБХ-д жин дарж байгаа энэ тохиолдолд түүнд таалагдах хүн байх ёстой. Тэр нь УИХ-ын гишүүн, Байнгын хороон дарга, Хөдөлмөрийн сайд, УИХ-ын дэд дарга, Ерөнхийлөгчийн зөвлөхөөр ажиллаж явсан Я.Санжмятав.

Ерөнхийлөгч асан Х.Баттулгын зөвлөхөөр ажиллаж байсан дотны найз, тэгээд ч намынхаа бусад лидерүүдтэй хэл амаа амархан ололцож чаддаг, чадвартай менежер гэвэл өнөөхөндөө түүнээс өөр сонголт бага байгаа юм. Бас ч өнгөрсөн олон жил улс төрд явахдаа нэр цэвэр байсан нь нөлөөлнө. АН-ын нүүр царай болж явсан ахмад гишүүд ч дуртай хүлээж авч буй аж. Түүгээр барахгүй дэмжинэ гэдгээ ч мэр сэр илэрхийлээд байгаа сурагтай.

Тэгвэл нөгөө талд нэгэнт намын дарга болсон Л.Гантөмөрийг хүрээлсэн хүмүүс байр сууриа хадгалах арга саам хайж эхэлжээ. Нэг гараараа амлалт, нөгөө гараараа сүрдүүлэг, харлуулалт хийж буй бололтой. Өнөөдрөөс Х.Баттулга, Ж.Санжмятав нарын 2013 онд “Оёдолчдын холбоо”-нд өгсөн 14.7 тэрбум төгрөгийн асуудал, С.Эрдэнэ Нийгмийн хамгааллын сайд байхдаа “Их тамир” амралтдаа НХС-гаас мөнгө олгосон тухай мэдээллүүд сэвэгдэж буйг чухамдаа Л.Гантөмөр хавиас хийгдэж буй ажил гэдгийг эх сурвалжууд нотолж байна. Энэ нь асуудал эвгүйцэхээс урьтаж Я.Санжмятавын нэр хүндийг унагаах, түүнд дэмжлэг үзүүлж болох улс төрийн нөлөөтэй Х.Баттулга, С.Эрдэнэ нарыг болгоомжлуулах зорилготой нь илэрхий байгаа юм. Ямар ч байсан АН-ын дотоод асуудал нэлээд савалгаатай болж, даргын сандал суудал хөдөлж мэдэх бэлтгэл эхэлжээ.