Жиан Шиупин, Пан Хучиан нарын тавь эргэм насны хос Хятадын Тикток орчинд аав, ээжийн үнэн хайрыг үзүүлж, жинхэнэ “ОД” болж байна. Сүүлийн хэдхэн сарын дотор хэдийнэ нэг сая давсан дагагчтай болж, онлайн арилжаа эрхэлж, их хэмжээний орлоготой болсон байна. Инхүү амжилтанд хүрсэн нууц нь дижитал аав, ээжийн үйлчилгээг Хятадын ганцаардсан залуу үеийнхэнд үзүүлдэгт оршино. Ар гэрийнхэнтэйгээ муудалцсан, харилцаа муутай залуус сэтгэлээ нээлцэж чаддаггүйн улмаас ганцаардаж, эцэг эхийн хайраар дутах үзэгдэл сүүлийн үед олширч буй талаар Хятадын нийгэм судлаачид хэдэн жилийн өмнөөс анхааруулж ирсэн. Тийм ч учраас Ж.Шиупин, П.Хучиан нарын дижитал аав, ээжийн бизнес ийнхүү амжилт олоод байгаа юм.

Дижитал аав, ээжийн үйлчилгээний талаар сонирхуулахад, тэд дагагчдаа “миний хүү, миний охин” гэж элэгсэгээр дуудаж, дэлгүүр хэсэх, гэр орны ажилд нь туслах зөвлөгөө бүхий бичлэг хийж, хаяг дээрээ байршуулан, хувь чаатаар хандсан хэнд ч эцэг эхийнх нь сэтгэлийг орлох халуун дотно үгс бичиж явуулдаг байна. Дагагчид нь ч тэдний энэ хандлагад талархалтай хандаж, хариуд нь “аав аа, ээж ээ” гэж дууддаг болжээ.

Шаанси мужид амьдардаг Шиупин, Хучиан нар өмнө нь хуримын бизнес эрхэлдэг байж байгаад Covid-19 цар тахлын үеэр дампуурч хүндхэн байдалд ороод байжээ. Харин одоо тэд дагагчдадаа аав, ээж нь бол сэтгэлийг нь бүлээсгэхээс гадна төрөл бүрийн зар сурталчилгаа явуулж, дижитал бизнес нь цэцэглэж байгаа гэнэ.