Эдийн засаг, хөгжлийн яамны харьяа Шинжлэх ухааны академийн Олон улс судлалын хүрээлэн, БНХАУ-ын Нийгмийн шинжлэх ухааны академийн Ази, Номхон далай ба дэлхийн стратегийн хүрээлэн хамтран “Монгол-Хятадын тинк танк форум-2026: XXI зуунд Хятад, Монголын иж бүрэн стратегийн түншлэлийн харилцааг гүнзгийрүүлэх арга зам ба боломж” сэдэвт эрдэм шинжилгээний хурлыг 2026 оны 9 дүгээр сарын 17-ны өдөр Улаанбаатар хотноо зохион байгууллаа.

Форумын нээлтийн ажиллагаанд Монгол Улсын Эдийн засаг, хөгжлийн дэд сайд С.Даваасүрэн, Монгол Улсын ШУА-ийн Ерөнхий эрдэмтэн нарийн бичгийн дарга Ш.Ариунаа, БНХАУ-аас Монгол Улсад суугаа Элчин сайдын яамны хэргийг түр хамаарагч Цао Ли, БНХАУ-ын Нийгмийн шинжлэх ухааны академийн дэд ерөнхийлөгч Ли Шюэсун нар оролцож, үг хэлэв.

Дэд сайд С.Даваасүрэн хэлсэн үгэндээ Монгол, Хятадын харилцааг шинэ шатанд гаргахад хоёр талын эдийн засгийн хамтын ажиллагаа, тээвэр, эрчим хүчний дэд бүтцийн харилцан холболтыг хөгжүүлэх, бизнесийн таатай орчныг бүрдүүлэх чиглэлээр хамтран ажиллахын ач холбогдлыг онцоллоо.

Форумын үеэр Монгол Улсын ШУА-ийн Олон улс судлалын хүрээлэн болон БНХАУ-ын Нийгмийн шинжлэх ухааны академийн Ази, Номхон далай ба дэлхийн стратегийн хүрээлэн хоорондын хамтын ажиллагааны харилцан ойлголцлын санамж бичигт гарын үсэг зурав.
Мөн хоёр орны судлаачид Монгол, Хятадын стратегийн уялдаа холбоо, худалдаа, эдийн засгийн хамтын ажиллагаа, хүмүүнлэгийн харилцаа, экологийн соёл иргэншил зэрэг асуудлаар илтгэл хэлэлцүүлж, санал солилцлоо.

Тус форум нь Монгол, Хятадын судалгааны байгууллагуудын хамтын ажиллагааг өргөжүүлэх, хоёр орны харилцан ойлголцлыг нэмэгдүүлэх, цаашдын хамтын ажиллагааны бодлогын санал, зөвлөмж боловсруулахад чиглэсэн чухал арга хэмжээ боллоо. Мөн форумын хүрээнд гарсан санал, зөвлөмжүүд нь хоёр орны харилцаа, хамтын ажиллагааг хөгжүүлэхэд хэрэгцээтэй мэдлэг ухааны дэмжлэг, бодлогын лавлагаа болох юм.