-Тэрбээр тарвага агнах тушаал гаргаж, үе үеийн Байгаль орчны сайд нарын бодлогын уламжлалыг таслав-

Байгаль орчныг салбарын яамнаас нь хамгаалах хэрэгтэй гэдэг оргүй хоосон үг биш. Тухайлбал,  БОАЖ-ын сайд Б.Бат-Эрдэнэ сүүлийн жил гаруйн хугацаанд төрийн тусгай хамгаалалттай болон байгалийн нөөц газруудад их хэмжээ газар олгосон бэлхэн жишээ байна. Тэрбээр мөн тоо толгой нь буурсны улмаас ахуйн болон үйлдвэрлэлийн зориулалтаар ашиглахыг хориглосон ан, амьтныг олон мянган тоогоор агнах, барихыг зөвшөөрсөн тушаал шийдвэр гаргах болжээ.

БОАЖ-ын сайд Б.Бат-Эрдэнэ өнгөрсөн намар нийт 4,500 тарвага, 30,000 заарт харх буюу ондарт агнах зөвшөөрөл олгосон байна. Үүнээс гадна зэрлэг гахай 6, агнуурын загас 6,000-ыг агнах барих зөвшөөрөл өгөөд байгаа аж. Монгол тарвага агнахыг хорилосон тушаалыг Байгаль орчны сайдын нарын тушаалаар 2005, 2006, 2014, 2017, 2021 онуудад гаргаж байсан. Үндсэндээ сүүлийн 20-иод жил ахуйн болон үйлдвэрлэлийн зориулалтаар тарвага агнахыг хориглож ирсэн. Хамгийн сүүлд БОАЖ-ын сайд асан Н.Уртнасан 2021 оны долоодугаар сарын 30-нд А/193 дугаартай захирамж гаргаж, тарвагыг ахуйн болон үйлдвэрлэлийн зориулалтаар агнахыг хориглох захирамжийг 3 жилийн хугацаагаар сунгаж байжээ. Энэ хугацаанд олон ч тооны иргэд хулгайгаар тарвага агнасан үйлдэлдээ хуулийн хариуцлага хүлээсэн байдаг.   Тэгвэл БОАЖ-ын сайд Б.Бат-Эрдэнэ тарвага агнах захирамж гаргаж, үе үеийн Байгаль орчны сайд нарын бодлогын уламжлалыг таслав.

Монгол орны ойт хээр, уулын хээр, хээр, тал хээрийн экосистемийн түлхүүр зүйл нь монгол тарвага (Marmota sibirica) бөгөөд 1990 оноос хойш тоо толгой нь дөрөв дахин буурсан гэдэг мэдээлэл бий. Ийнхүү тарваганы тоо толгой цөөрч, тархац нутаг хумигдаж байгаа тул агнахыг хориглосон. Монгол тарвага нь Дэлхийн байгаль хамгаалах холбоо (IUCN)-ны олон улсын (2014) болон бүс нутгийн (2006) үнэлгээгээр устаж болзошгүй ангилалд тус тус хамруулсан байдаг. Хэдийгээр зарим аймаг, суманд тарвага өссөн гэсэн мэдээлэл байгаа боловч тодорхой тоо баримттай судалгаа байхгүй. Иймд судлаачдын зүгээс хэрэв тарвагыг бүсчлэх байдлаар ахуйн зориулалтаар  агнахыг зөвшөөрсөн тохиолдолд тоо толгой эрс цөөрөх хортой үр дагавар үүсэх талаар анхааруулж ирсэн юм.