Барууны орнуудад бага болон дунд ангийн сургуулийн багш нар ажлаасаа гарах явдал өдрөөс өдөрт нэмэгдэж байгаа талаар хэвлэлүүд сэтгэл зовнин мэдээлж байна. Шалтгаан нь цалин мөнгө, ажлын байртай огт хамааралгүй аж. Тикток хуудаснаа fitpeanut нэртэй нэгэн багшийн зовлон, жаргалаа ярьсан цуврал бичлэг олон улс даяар анхаарал татах болжээ. Түүний ярьж буйгаар сүүлийн жилүүдэд ажлаа хийх ямар ч боломжгүй болж байгаа гэнэ. Жинхэнэ шалтгаан нь сурагчдын нөхцөл байдал бус тэдний эцэг эхээс үүдэлтэй. Fitpeanut болон бусад багшийн томъёолсончлон “шинэ үеийн эцэг эх”-чүүд туйлын зовлонтой хүмүүс болжээ. Бүтэн 24 жил багшилсан fitpeanut-ийн хувьд хэдхэн сарын дараа тэтгэвэрт гарах гэж байсан ч ажилдаа шантарч өөрийн хүсэлтээр ажлаасаа гарсан байна. Хичээлийн танхимд 32-34 сурагчтай хичээл хийх үед төрөл бүрийн хүндрэл гарах нь энгийн үзэгдэл боловч эцэг эхчүүд даарин дээр давс нэмэх нь улам олширсон байна. Багш нарыг ингэтэл мохоож буй гол шалтгаан нь эцэг эхчүүдийн хандлага. Тэд багш нарыг хүүхэд асрагч шиг үзэж, маш дээрэнгүй хандаж, шалихгүй зүйл дээр ч гомдоллож, хэл ам татах ажил хийх ямар ч боломжгүй болгож байгаа аж. Судалгаанаас авч үзэхэд барууны орнууд, тэр дундаа Европын хамгийн өндөр хөгжилтэй Франц, Британи, Герман, Швед зэрэг оронд багш нар ажлаасаа гарах нь огцом нэмэгджээ. Шалтгаан нь мөн адил багш нарыг хүүхэд асрагч гэж үзэж, тэвчээрийг нь бардаг эцэг эхчүүд.