ОХУ-тай хил залгаа оршдог Польш тэргүүтэй НАТО-гийн гишүүн орнууд хилийн зурвас дагуу долоон давхар хамгаалах бүс байгуулах төлөвлөгөөгөө танилцууллаа. Энэхүү төлөвлөгөөний зорилго нь ОХУ-ын талаас үйлдэж болзошгүй халдлагаас сэргийлэх гэж НАТО-гийн гишүүн орнууд тайлбарлав. Польшийн Батлан хамгаалахын сайд даваа гарагт хийсэн мэдэгдэлдээ “Энэ бол ОХУ, Беларусын хил дагуух бүсийг бэхжүүлэн хамгаалах зүүний бамбай юм” гэжээ. Хамгаалах зурвас нь 1945 онд дууссан Дэлхийн хоёрдугаар дайнаас хойш НАТО-гийн зүүн жигүүрээ батлан хамгаалах хамгийн том арга хэмжээ юм гэдгийг дэлхийн хэвлэлүүдэд онцолж байна. Төлөвлөгөөнд тусгасны дагуу босгох долоон давхар хамгаалалтанд: Төмөр хашаа, өргөст торон хашаа, танк эсэргүүцэх шуудуу, танкны давшилтыг хориглох саад бүхий талбар, газрын мина, нэмэлт шуудуу, мод, бут бүхий ногоон хамгаалалт багтана. Тэдгээр дээр анхааруулах, ажиглах систем, дрон эсэргүүцэх систем зэргээр тоноглох юм байна. Польшийн Зэвсэгт хүчний тэргүүн генерал Вьеслав Кукулагийн мэдээлснээр энэ төсөл нь Польшийн эсэргүүцэх чадамжийг нэмэгдүүлэх, дайсны цэргийн хөдөлгөөнийг хориглож, Польшийн цэрэг, ард иргэдийг хамгаалах зорилготой гэжээ. Зүүний бамбай гэх энэ хамгаалах зурвас нь нийт 435 бээр буюу 783км үргэлжилнэ. Польшийн талаас төслийг хэрэгжүүлэхэд 2.56 тэрбум ам.доллар төсөвлөж, 2028 он гэхэд бүтээн байгуулалтын ажлыг дуусгахаар төлөвлөсөн байна.