Тус улсын Батлан хамгаалахын сайд Дун Жүн өнгөрөгч ням гарагт цэргийн хүчээр Тайванийн тусгаар тогтнолыг устгаж чадна, гэхдээ АНУ-ын талтай бодит яриа хэлцэл хийх хүсэлтэй буйгаа илэрхийллээ. Сингапурт жил бүр болдог уламжлалт аюулгүй байдлын форум дээр хоёр талын Батлан хамгаалахын сайд 18 сарын өмнөх уулзалтаас хойш анх удаа нүүр тулсан уулзалт хийсэн нь тэр байв. “Бид ямагт хамтын ажиллагаа, яриа хэлцлийг эрхэмлэж ирсэн, гэвч үүний тулд хоёр тал дундаа уулзах шаардлагатай байна” гэж Дун Жүн өнгөрсөн долоо хоногийн баасан гарагт АНУ-ын Батлан хамгаалахын нарийн бичгийн дарга Ллойд Остинтой Шангри-лагийн хэлэлцээр дээр уулзах үеэрээ цохон тэмдэглэж байсан юм. Тэрээр цааш нь хэлэхдээ “Хоёр талын зэвсэгт хүчний ялгаа их байгаа учраас нарийн бөгөөд тодорхой яриа хэлцлийг илүү ихээр зохион байгуулах нь зөв” гэжээ. Дун Жүн, Ллойд Остин нар тусгайлан цаг гаруй уулзсан бөгөөд тэдний оролцсон форумд олон улсын батлан хамгаалах салбарын албаныхан оролцдог юм. Мөн тэдний уулзалтыг АНУ, БНХАУ-ын харилцаа ямар түвшинд явааг илтгэсэн хэрэг боллоо гэж олон улсын ажиглагчид дүгнэж байна. Харин уулзалтын дараа ноён Остин хэвлэлд өгсөн мэдээлэлдээ АНУ, БНХАУ-ын батлан хамгаалахын удирдлагууд ойрын саруудад багтаан уулзана. Ингэснээрээ Бээжингээс гаргасан хоёр орны аюулгүй байдлын харилцааг тогтворжуулах уриалгад манай талаас хариу өгч буй хэрэг болно гэжээ.