Мексикт өнгөрсөн долоо хоногт Ерөнхийлөгчийн сонгууль түүхэндээ анх удаа эмэгтэй Төрийн тэргүүнтэй болсон. Тангаргаа ч өргөж амжаагүй Клаудиа Шайнбаумыг хар тамхины картелиудын хүчирхийлэл, мөнгөгүйн улмаас зогссон нийгэмд чиглэсэн төсөл, хөтөлбөрүүд, удахгүй халаагаа өгөх Ерөнхийлөгч, шинээр сонгогдсон ялагчийн чиглүүлэгч Андрес Мануель Лопез Обрадорын сүүдэр гээд уртаас урт зовлон дурдсан жагсаалт хүлээж байна. Гэхдээ олон улсын ажиглагчдын хамгийн ихээр онцолж буй гурван зовлон бол мөнгө, яриа, АНУ-ын сонгууль.

Клаудиа Шайнбаум нь ирэх аравдугаар сарын 01-нд зургаан жилийн хугацаатай Ерөнийлөгчийн тангаргаа өргөж, дөрвөн сарын дараагаас л өөрийн засаг захиргааны ажлыг тодорхойлж эхэлнэ. Энэ хооронд Лопез Обрадор өглөө бүр хэвлэлийн товчлол хүргэх гэх мэт өдөр тутмын ажил үүргээ хэвийн гүйцэтгэх юм. Бараг л Мексик улс хоёр Ерөнхийлөгчтэй болсон гэсэн үг. Өнөөгийн Ерөнхийлөгчийг тус улсын нийгмийг хувааж, холдуулсан гэж буруутгадаг бөгөөд К.Шайнбаум тэр хагарлыг эвлүүлнэ гэж амласан. Лопез Обардор бол массын удирдагч, харин К.Шайнбаум бол академикч, эрдэмтэн. Лопез Обрадор үүрэгт ажлаа хүлээлгэж өгсний дараа залгамжлагчийнхаа засаг захиргааны ажилд хөндлөнгөөс оролцохгүй гэдгээ мэдэгдсэн.

Эргээд гурван зовлонгийн асуудалдаа ороход нэгдүгээрт К.Шайнбаумд өмнөх хүнийхээ хэрэгжүүлж буй томоохон нийгмийн хөтөлбөрүүдийг  хэрэгжүүлж, амласан шигээ Засгийн газарын төсвийн алдагдлыг нөхөж чадах болов уу. Үүний тулд санхүүгийн шинэчлэл хийх шаардлагатай. Үгүй бол Мексикийн газрын тосны орлого огцом буурч буй тул К.Шайнбаумын гар хүлээтэйгээс өөрцгүй байдалд орно. Мексикийн төрийн мэдлийн Пемекс газрын тосны компани тус улсын орлогын гол эх үүсвэр боловч алдагдалтай ажиллаж байгаа. Дээр нь цаг уурын эрдэмтэн К.Шайнбаум ногоон эрчим хүчинд шилжих зорилт тавьсан ч түүний тулд багагүй мөнгө шаардлагатай. Ийнхүү Ерөнхийлөгчийн засаг солигдох энэ үйл явц нь АНУ-ын Ерөнхийлөгчийн сонгуулийн компанит аянтай давхцаж буй нь энэ хоёр үйл явдал салшгүй холбоотой болж хувирсан. Ер нь ч Мексикийн хамгийн чухал сонгууль ирэх арваннэгдүгээр сарын 05-нд болно гэж олон улсын ажиглагчид шоглох аястай дүгнэж байна. Ж.Байден дахин сонгогдох эсхүл Д.Трамп эрх мэдэлдээ эргэн ирэхийн алинд ч Мексикийн улс төрийн амьдрал өөрчлөгдөх аястай. Өртөх гол салбар нь аюулгүй байдал, худалдаа, цагаачлалын бодлогоос гадна Мексикийн зэвсэгт хүчний гүйцэтгэх үүрэгтэй холбоотой дотоод шийдвэр гэж ажиглагчид тодорхойлж буй.

АНУ-д боловсрол эзэмшсэн Клаудиа Шайнбаумын гурав дахь зовлон бол яриа бас хэлцэл. Хөрш зэргэлдээх улс орнууд, Өмнөд Америкийн орнуудын Америкийн нөлөөллийн эсрэг нэгдэл гээд хилийн чанадад шийдэх асуудал их. Тэгэхээр Мексикийн өмнөх Төрийн тэргүүд Өмнөд Америкийн орнуудын талд зогсож байсан бол К.Шайнбаумын засаглал олон улсын харилцаанд хэний талд зогсох нь одооноос сонирхол татаж байгаа. Үүн дээр эрх баригч Морена намыг хоёр иртэй хутгатай адилтгадаг учраас дотоодын улс төр, тэр дундаа нам доторх асуудлыг ямар тохиролцоогоор шийдэх нь таавар хэвээр. Дэлхийн цаг уурын өөрчлөлт, ногоон эрчим хүч гэх мэт Мексик өнөө цагт шийдвэрлэх боломжгүй байгаа ихээхэн санхүү шаардсан мөрөөдлийг байнга ярьдаг шинэ Ерөнхийлөгч эмэгтэй Лопез Обрадорын санал болгосон үндсэн хуулийн шинэчлэл, гүйцэтгэх эрх мэдэлтнүүдийг хязгаарлах, шүүгчдийг бүх нийтийн санал асуулгаар шийддэг болох зэрэг хуваагдлын эхийг тавьсан асуудлыг шийдвэрлэхэд ямар яриа хийх бол?

Мексикийн болон олон улсын ажиглагчид “Үнэндээ, Клаудиа Шайнбаум ажлаа авсаны дараа хандах хүн нэг ч алга” гэж дүгнэв.