Украинийн парламент Зүүн Европт орших тус улс дахь англи хэлний хэрэглээг нэмэгдүүлэх шинэ хууль баталлаа. Ирээдүйд англи хэл нь төрийн албан хаагчдын дунд өргөн хэрэглээний хэл болох үндэсийг ийнхүү тавилаа гэж өнөөдөр Киевээс мэдээлэв. Англи хэлний хэрэглээг нэмэгдүүлснээр Украин нь жуулчдыг татах, олон улсад өрсөлдөх чадварыг сайжруулна гэж үзжээ. Мөн англи хэлний хэрэглээг түгээмэл болгох нь тус улсын Европын холбоонд элсэхэд онц шаардлагатай, стратегийн алхам юм гэж хууль зүйн салбарынхан тайлбарлаж байна. Тухайлбал, хил, гаалийн албан хаагчид, прокурор болон цагдаагийнхан гадны иргэдтэй англиар чөлөөтэй харилцах чадвар суулгах нь нэн тэргүүний чухал асуудал гэв. Түүнчлэн түргэн тусламжийн дуудлагын ажилтнууд, эмнэлгийн үйлчилгээ үзүүлэх эмч, сувилагч нар дээрх хуулийн дагуу англи хэлний мэдлэгээ сайжруулах шаардлагатай болж байна. Музейн үзвэрүүдийн тайлбарыг англи хэл дээр хөрвүүлэх, төрийн мэдлийн байгууллага, их сургуулиудын цахим хуудас бүгд англи хэлний сонголттой болох юм. Харин энгийн иргэдийн англи хэлний мэдлэгийг сайжруулахын тулд сургуулийн өмнөх төвүүдэд сургалт, хөтөлбөрийг хэдийн боловсруулах ажилдаа орсон байна. Үүн дээр кино, нэвтрүүлгийг англи хэл дээр болон хадмал орчуулгатай нэвтрүүлэх журмыг шинэ хуульд тусгаж өгчээ.