Төмс гэхээр бидний өдөр тутамдаа хэрэглэдэг түгээмэл хүнс шууд санаанд бууна. Тэгвэл төмс идэх нь хүний насыг уртасгахад тустайг та мэдэх үү?! Гэхдээ нэг зүйлийг анхааруулахад төмсийг зөв аргаар болгож, хэрэглэж байж л та насаа уртасгах боломжтой гэнэ.

“Journal of nutrition” сэтгүүлд гарсан шинэхэн судалгааны дүнгээс танилцуулахад өдөр тутмын хоолны дэглэмдээ төмсний эзлэх хувийг ахиухан нэмээд өгвөл эрт нас барах эрсдэлийг буруулах ач тустай гэнэ. Хамгийн гол нь, төмсний ашиг тустай чанарыг биедээ шингээхийн тулд зөв аргаар боловсруулж, хэрэглэхийг эрдэмтэд зөвлөж байна. Төмсийг шарах, жигнэх, буцалгах, нухашлах гээд олон янзаар болгож идэж болдог ч гэлээ ихэнх нь түүнд агуулагдах шим тэжээлийн чанарыг алдагдуулах хоруу чанартай. Энэ хүнс нь кали, жимс ногооны эслэг, С амин дэм зэрэг олон чухал тэжээллэг бодис агуулахаас гадна фенолийн хүчил тэргүүтэй хэд хэдэн биоактив нэгдлийг агуулдаг учир хүний биед тустай. Хэдийгээр дээр дурдсан судалгаанд төмс зүрх судасны болон бусад төрлийн өвчнийг илааршуулахад ямар сайн нөлөө үзүүлэх нь тодорхойгүй ч гэлээ чанаж идвэл олон янзын шим тэжээлээр хүний биеийг тэтгэж, урт наслахад нөлөөлдөг байна. Учир нь, төмсийг бүтнээр нь чанахад дээр дурдсан болон өөр олон төрлийн шимт бодисын агууламж хэвийн хадгалагддаг аж.

Эрдэмтэн Арсенан болон түүний хамтран зүтгэгчид төмсний судалгааг Норвегид явуулж, 77,297 хүнийг ажиглаж, эрүүл мэндийн дүн шинжилгээ хийсэн байна. Судалгаанд оролцогсдын 80-аад хувь нь өдөр тутмын хүнсэндээ төмс тогтмол хэрэглэдэг бөгөөд гол төлөв чанаж, нарийн ногоогоор амталж идэх дэглэмтэй байв. Тэдний эрүүл мэндийн үзүүлэлтийг төмс бага хэрэглэдэг эсвэл түргэн хоолоор дамжуулан шарсан төмс ихээр хэрэглэдэг хүмүүсийнхтэй харьцуулж үзэхэд 30%-иар урт наслах тооцоо гарсан байна. Товчоор дүгнэхэд, эрдэмтэд долоо хоногт 14 ширхэг төмс тогтмол идвэл бүх төрлийн өвчлөлөөр нас барах эрсдэл 12%-иар буурна гэсэн дүгнэлтэнд хүрчээ.