Хүний хөдөлмөр хөнгөвчилсөн зөвлөгөө бүхий бичлэгүүдийг интернет орчинд үзэгчдийн тоо асар өндөр байдаг билээ. Гэтэл хөдөлмөр хөнгөвчилсөн тэр арга нь бусдын амьдралд саад болно гэж хэн санах вэ?!

АНУ-ын Орландо хотын Олон улсын нисэх онгоцны буудал дээр нэгэн зорчигч тээшээ шалгуулах үеэр маргаан үүсчээ. Зорчигч бүх ачаагаа дэрний уутанд багтаан чихсэн ч онгоцны буудлын шалган дээр энгийн дэр хэмээн мэдүүлснээр байдал хурцадсан байна. Онгоцны буудлын ажилчид зорчигчийг тээшээ шалгуулахыг шаардахад эсэргүүцэл үзүүлж, тэдний маргалдаж буй бичлэг ТикТокт орсноор цагдаагийнхныг уг хэрэгт оролцоход хүргэжээ.

Нэр нь үл мэдэгдэх зорчигч интернетээс үзсэн алдартай инфлюнсерийн тээш баглах зөвлөгөөг дагаснаа цагдаа нарт мэдүүлжээ. Бичлэг олон хүний анхаарал татсан бөгөөд интернетийн хөдөлмөр хөнгөвчлөх, амьдралд тустай гэх олон янзын бичлэгүүдийг үзэхэд таатай байж болох ч бодит байдалд хэрэгжүүлэхгүй байх нь дээр гэсэн зөвлөгөөг хашир туршлагатай интернет хэрэглэгчид өгөөд эхэлжээ.

Зорчигч тээшээ худал мэдүүлснээс гадна хамгаалалтынхны шаардлагыг биелүүлэхээс татгалзаж, онгоцондоо суух гэж зүтгэсэн учир онгоцны буудлын удирдлагууд зүй бус үйлдэлд нь зохих хариуцлагыг тооцож, тухайн өдрийн нислэгээр үйлчлүүлэх эрхийг нь хааж, хориг тавьсан байна.