БНХАУ-ын Юнан Буддийн хиймэл агуйн 252 хөндийд 51,000 орчим хөшөө сийлсэн бөгөөд зарим нь багадаа 1,500 жилийн настай гэдгээрээ алдартай учир сая, сая жуулчны очих дуртай чиглэл болдог. ЮНЕСКО-гийн Дэлхийн өвд багтах уг дурсгалт газрын бие засах газар сүүлийн үед интернетийн анхаарлын төвд ороод байна. Учир нь, орон нутгийн мэдээллийн хэрэгслүүд болон сошиал медиягаар цацагдсан нэгэн бичлэгт эмэгтэй бие засах газрын дөрвөлжилсөн хаалт бүхий цуваа суултуурын дээр дижитал цаг байрлуулсан нь ийнхүү олныг гайхашруулаад байгаа юм. Суултуур бүрийн хаалган дээр байрлах ЛЕД дэлгэц хүнгүй үед ногоон өнгийн “хоосон” гэсэн бичиг гардаг бол хүн орж, хаалгыг нь түгжсэн мөчөөс эхлээд тухайн хүн хэр удаан сууж буйг заах цаг явж эхэлдэг аж. Өвөрмөц цагийн бичлэгийг нэгэн сониуч хүн орон нутгийн Шиаошиан Морнинг Херальд сонинд илгээснээр хэвлэл болон сошиалынхны анхаарлын төвд орсон гэнэ. Сонинд гарсан мэдээлэлд “Бие засах газрын хаалгыг ийнхүү цагтай болгосон санаанд оромгүй дэвшилтэт технологи болжээ. Үүний ачаар хэн, хаана хэр удаан суусныг мэдэж авснаар суултуурын хаалгыг тогших шаардлагагүй болсон байна” гэж бичлэг явуулсан хүн ярьжээ. Нөгөөтэйгүүр, цагтай суултуур ашигласан хүмүүс бусдын ажиглалтанд байгаа мэт эвгүй сэтгэгдэл төрүүлсэн талаар ч гомдоллосон байна.