Сая, сая аргентинчуудын эрх ашгийг зөрчих шинэчлэлийг дэмжсэн Конгрессийн шийдвэрт эгдүүцсэн иргэд жагсаал зохион байгуулж, цагдаагийнхан тэднийг тараахаар нулимс асгаруулагч, усан буу ашиглан мөргөлдөөн үүсжээ. Жагсагчид гар аргаар хийсэн тэсрэх бөмбөг, чулуугаар зэвсэглэн хариу барьсан байна. Олон тооний хүн гэмтэж бэртсэн нүд халтирам зураглал бий болсон Буэнос-Айрес хотыг дайны байдалтай байна гэж орон нутгийн хэвлэлүүд мэдээллээ. Аргентинийн Ерөнхийлөгч, барууны үзэлт Хавьер Милей уналтад орсон эдийн засгаа дахин босгохын тулд санхүүгийн онц байдал зарлан төсвийн шинэчлэлт хийх санал дэвшүүлээд байгаа юм. Гэвч уг шинэчлэлд тэтгэвэр, тэтгэмжийн хэмжээг бууруулж, ажиллах хүчний эрхийг хязгаарлахаар тусгасан нь ийнхүү аргентинчуудын дургүйцлийг хүргэсэн байна. Энэхүү арга хэмжэг зүүний үзэлт улс төрийн намууд, үйлдвэрчний эвлэлүүд, нийгмийн байгууллагууд хүчтэй эсэргүүцэж байгаа юм. Харин Ерөнхийлөгч Х.Миллейн ажлын албанаас Засгийн газрын шинэчлэлийг эсэргүүцэн үймээн дэгдээсэн иргэдийг төрийн эргэлт хийхийг завдсан “террористууд” хэмээн буруушаажээ.