БНСУ-ын нийслэл Сөүл хотын ойролцоо орших Инчеон хотын нэгэн фитнесс танхимынхаа үүдэнд “Ажумма нарыг оруулахгүй. Зөвхөн боловсрол, хүмүүжилтэй эмэгтэйчүүдэд үйлчилнэ!” гэсэн бичиг өлгөснөөр тус улс даяар ахимаг настай эмэгтэйчүүдийг ялгаварлалаа гэх шуугиан дэгдээд байна. Солонгос хэлэнд “ажумма” гэх үг нь ахимаг настай буюу 30-аас дээш насны эмэгтэйчүүдийг төлөөлүүлэхээс гадна ааш муутай, бүдүүлэг эмэгтэйг заадаг үг юм. Манайхаар бол “балай авгай” гэсэн утгатай. Орон нутгийн хэвлэлүүд дээрх шийдвэрийг гаргасан фитнесс болон эзэмшигчийнх нь нэрийг зарлаагүй ч хэл амтай, балмад авгай нарын уршгаар олон удаа хохирол амссан гэж мэдэгджээ. Йонхап агентлагийн дамжуулснаар зарим ахимаг насны эмэгтэй хувцас солих өрөөнд хувцас угаах зэргээр 2-3 цаг саатаж, хүндрэл учруулдаг. Саван, арчуур, үс хатаагч хулгайлах нь энгийн үзэгдэл болсон гэж фитнессийн эзэн гомдолложээ. Түүгээр ч зогсохгүй авагай нар олуулаа эгнэж суучихаад үйлчлүүлэгчдийн биеийн галбир, царай зүсийг гоочилдог. Энэ мэтчилэнгээр фитнесс танхимд сөрөг уур амьсгал үүсгэх нь маш хүндрэлтэй учир үйлчлүүлэгчдээ алдаж эхэлсэн гэв.

Харин энэ мэдээлэл гарснаас хойш тус улсын интернет хэрэглэгчдийн дунд хүчтэй маргаан үүсэж, хүнийг нас, хүйсээр нь ялгаварлалаа гэж хурцаар шүүмжилж, хоёр хуваагдчихаад байгаа юм байна. “Ажумма” гэх үг яагаад “муу үйлчлүүлэгч” гэх үгийг орлох болсон талаар ч олон зуун хүн асуудал дэвшүүлжээ. Шүүмжлэлийн бай болсон дээрх фитнессийн эзэмшигч байр сууриа хамгаалан өгсөн хариултдаа “ажумма нар нүдэнд үзэгдсэн бүхнийг үнэгүй мэт авдаг. Төлбөрөө төлөхдөө ч хорголоо тоолдог мөртлөө манай талаас мөнгө зарж тохижуулсан бараа, бүтэгдэхүүнийг өөрийн мэт гэртээ аваад харьчихдаг нь огт таалагддаггүй. Хүнийг бодох сэтгэлтэй байх хэрэгтэй” хэмээжээ.

Өмнөд Солонгост ганц энэ фитнессээр зогсохгүй олон нийтийн үйлчилгээний газруудад ч бүдүүлэг үйлчлүүлэгчдийн авирлах нь хэрээс хэтэрсэн учир бага насны хүүхэд, ахимаг насныханд үйлчлэхээс татгалзах нь сүүлийн жилүүдэд улам олширч байгаа юм байна. Зарим газарт үйлчлүүлэгчдийнхээ насыг маш нарийн заасан анхааруулгыг үүдэндээ өлгөдөг болжээ.