Европын хамгийн том энх тайвны судалгааны Стокгольмийн хүрээлэнгээс олон улсын зэр зэвсгийн байдалд дүн шинжилгээ хийж, тайлангаа танилцууллаа. Тус хүрээлэнгийн гаргасан нийт тооцооллоор БНХАУ-ын эзэмшиж буй цөмийн цэнэгт хошууны тоо улам нэмэгдэх хандлагатай байна. Товчоор SIPRI гэж нэрлэдэг тус хүрээлэнгийн мэдээлснээр БНХАУ нь 2023 онд 410 цөмийн цэнэгт хошуутай байсан бол нэмэгдсээр өнөөдрийн байдлаар 500-д хүрсэн аж. Мөн тус улсын Батлан хамгаалах яамныхан хаана ч байхгүй хамгийн хурдан пуужин харвагчийг бүтээхээр ажиллаж эхэлсэн нь олон улсад аюулын харанга дэлдэж байна гэв. “Харин ойрын ирээдүйд буюу 2030 он гэхэд Бээжин бүрэн ажиллагаатай 1,000 цөмийн цэнэгт хошуутай болох магадлал өндөр. Ингэснээр эдийн засаг нь удаашралтай байгаа ч гэсэн цэрэг, зэвсэглэлийн салбарт дэлхийн бусад орнуудыг чичрүүлэх хэмжээнд хүрнэ” гэж Стокгольмын энх тайвны судалгааны хүрээлэнгийн үй олноор устгах зэвсгийн мэргэжилтэн Ханс М.Кристэнсэн анхаарууллаа. Хэрэв БНХАУ дээр Умард Солонгосын цөмийн зэвсгийн хүчин чадлыг нэмбэл тун удахгүй АНУ болон ОХУ-тай эн зэрэгцэх төлөвтэй байна. Сонирхуулахад, АНУ 5,044 цөмийн цэнэгт хошуутай бол ОХУ 5,580 цөмийн цэнэгт хошуутай. Эдгээр нь нийлээд дэлхийн цөмийн зэвсгийн 98%-тай тэнцдэг гэнэ.