Саудын Араб улс 170км-ийн урттай, 500м-ийн өндөртэй, 200м-ийн өргөнтэй The Line буюу Шугам хэмээх нэртэй нүсэр бүтээн байгуулалт хийнэ гэж зарлаад барилгын ажил эхэлчихсэн яваа. Гэхдээ уг толин ханатай аварга хотыг байгуулна гэдэгт үл итгэгчид олон байсан ч тус улсын угсаа залгамжлах хунтайж Мухаммед Бин Салман 2023 оны долоодугаар сард гарсан зурагтын баримтат кинонд “Хүмүүс үл итгэж л байг. Бид заавал бүтээн байгуулна” хэмэнэ ам бардан дуугарч байсан билээ. Атал нэг жилийн дараах байдлаар зарим үл итгэгчдийн зөв болж таарч байх шиг байна.

Саудын Арабын аугаа их бүтээн байгуулалт зөвхөн Шугам гэх төслөөр зогсохгүй. “Алсын хараа-2030” хөтөлбөрийн цөм болсон Неом тэргүүтэй нийт 13 аварга төсөл хэрэгжүүлэхээр ажиллаж байгаа юм. Чин үнэндээ өнөөдрийн байдлаар тэдний энэхүү мөрөөдөл зарим талаараа эргэлзээтэй болж эхэлсэн тул тодорхой хэмжээгээр танах, хумихаас өө аргагүй байдалд орсон талаар дэлхийн хэвлэлүүд мэдээлж буй. Угтаа бол эдгээр төсөл нь тус улсын эдийн засгийг төрөлжүүлж, газрын тосны хамаарлаас холдуулах зорилготой алсыг харсан бодлого байлаа. Хунтайж Мухаммедийн санаачилсан уг бодлогыг хэрэгжүүлэхэд олон их наяд доллар шаардлагатай. Гэтэл сүүлийн үед дэлхийн зах зээл дэх нефтийн үнэ унаснаас Саудын Арабын орлого буурч Засгийн газар дээр дурдсан аварга төслүүдэд дахин үнэлгээ хийж, санхүүгийн шинэ стратеги боловсруулахаар ярилцаж эхэлжээ. Ингэснээр Шугам, Неом зэрэг томоохон хотуудыг барих ажил түр саатахаас гадна төслийн хамрах хүрээг хумихаас өөр аргагүй байдалд орсон гэж албаныхан мэдээллээ.