Өнгөрсөн наймдугаар сарын 17-ны өдөр Энэтхэгийн Уттар Драдеш мужид бага насны хүүхэд чонын дайралтад өртсөн харамсалтай хэрэг гарчээ. Тухайн үед тосгон даяар цахилгаан тасарсан бөгөөд гэрийнхээ гадаа унтаж байсан дөрвөн настай охиныг чоно зуугаад зугтсан байна. Харамсалтай нь, маргааш өглөө нь охины цогцсыг гэрээсээ 500 метрийн зайд олжээ. Мөн түүнээс нэг сарын өмнө хөрш тосгоны найман настай хүүг унтаж байхад нь чоно дайрах үеэр ээж нь амжиж аварсан байна. Энэ мэтчилэнгээр энэ оны дөрөвдүгээр сарын дунд үеэс хойш 30 гаруй тосгонд есөн хүүхэд, нэг том хүн чонын олз болж, амиа алдаж, 34 хүн шархдаад байгаа аж. Хохирогчдын хамгийн бага нь нэг ойтой бол ахмад нь 45 настай эмэгтэй.

Чоно ийнхүү хүн оршин суудаг газарт олноор үзэгдэж, олон тооны хүн хохирсны улмаас Энэтхэг, Непалын хил дагуу орших тосгодын эрчүүд шөнийн цагаар эргүүлд гарч, бага насны хүүхэд болон эмэгтэйчүүдийг гэрээс нь гаргахаа больжээ. Үр дүнд нь гурван чоно барьж, амьтны хүрээлэнд тушаасан байна. Мэргэжилтнүүд баригдсан чононд үзлэг хийхэд бүгд галзуу өвчин тусчээ. Үүнээс үүдэн сүүлийн жилүүдэд чоно хүн рүү дайрах нь олширсны шалтгааныг вирусаар халдварладаг галзуу өвчин болохыг тогтоолоо гэж Уттар Прадеш мужийн захиргаанаас CNN-нд мэдээлсэн байна.

Норвегийн Байгаль судлалын хүрээлэнгийн мэдээлснээр 2002-2020 оны хооронд Энэтхэг тэргүүтэй 21 улсад галзуу чоно хүн рүү дайрсан тохиолдол 489 удаа гарснаас 26 нь амины хохиролтой байв. Энэ нь 1990-ээд онтой харьцуулахад маш өндөр тоо. Дээр нь сүүлийн үед Энэтхэгт энэ үзэгдэл олширсон нь анхаарууштай хэрэг гэдгийг анхааруулсан байна.