Одоогоос таван жилийн өмнө Норвеги орчмоос камераар тоноглосон белуга халим олдож, дэлхий даяар алдаршаад байлаа. Уг халимыг ОХУ-ын Тэнгисийн цэргийн хүчнийхэн тусгайлан бэлтгэж, сургасан тагнуул байх магадлалтай гэж хардаж байсан юм. Гэтэл саяхан “Оросын тагнуулч халим” хочтой Хвалдимир гэх белуга халимны хүүр саяхан олдож, олон нууцлаг асуулт үлдээсэн байна.

Норвегид белуга халим хамгаалах үйл ажиллагаа явуулдаг “OneWhale”, “NOAH” байгууллагынхан Хвалдимирийг зориудаар буудан хөнөөснийг сумны шарх нотолж байгаа тул тул гэмт хэргийн мөрдөн шалгах ажиллагаа явуулахыг эрх баригчдаас шаардаж байна. “OneWhale”-ийнхэн малын эмч, биологич, галт зэвсгийн мэргэжилтний баг бүрдүүлж, Хвалдимирийн хүүрийг задлан шинжлээд холбогдох нотлох баримтуудыг цуглуулж, баталгаажуулсан гэж мэдэгджээ.

Норвегийн Баруун өмнөдийн цагдаагийн газарт тагнуулч халимны хэргийг мөрдөн шалгах хүсэлт ирсэн. Гэхдээ эрүү үүсгэж, шалгах эсэхийг хараахан шийдээгүй байгаа гэж мэдээлснийг СNN агентлаг уламжиллаа.