Европын холбооноос саяхан баталсан Европын аялал жуулчлалын мэдээлэл, зөвшөөрөл олгох систем буюу ETIAS 2025 оны арваннэгдүгээр сараас хэрэгжиж эхэлнэ. Гэхдээ энэ систем нь Шенгений орнуудад визгүй зорчдог АНУ, Канад, Япон, Австрали зэрэг улсын иргэдэд хүчин төгөлдөр үйлчлэх юм. Хамрах хүрээний хувьд Европын холбооны гишүүнчлэлтэй 26 улс багтах аж. Мөн ойрын жилүүдэд Болгар, Хроват, Кипр, Румын зэрэг Шенгений бүсийн бус орнуудад хэрэгжүүлэхээр төлөвлөж байгаа юм байна. Ирэх оны төгсгөлөөс хэрэгжиж эхлэх уг систем нь Европ дахь аюулгүй байдал хангах, хэв журам сахиулах зорилготой бөгөөд Шенгений орнуудын хилээр нэвтрэх шаардлага өндөрсөж байгаа гэсэн үг юм. Албан ажил, эрүүл мэнд, аялал жуулчлал гээд бүхий л зорилгоор хил давахаар зэхэж буй Америк зэрэг визнээс чөлөөлөгдсөн орны иргэд урьдчилан онлайнаар бүртгүүлэх ёстой бөгөөд 18-70 насны иргэд 7-8 еврогийн төлбөр төлж, хилээр нэвтрэхийн тулд хурууны хээгээ уншуулах, аяллын зорилго болон бусад хувийн мэдээллийг үнэн зөвөөр бөглөх шаардлагатай. Бодлого хэрэгжүүлэгч талаас уг мэдээллийг мэдээллийн санд оруулж, Европын холбооны аюулгүй байдлын мэдээллийн сан, Интерпол, Европол, Шенгений мэдээллийн систем, VIS буюу Виз мэдээллийн системийн мэдээлэлтэй автоматаар тулгаж үзсэнээр хил давах эрх олгох юм байна. Европын холбооны зүгээс дээрх нэмэлт шаардлагыг хэрэгжүүлэх, иргэд бүртгүүлэх ажлыг хялбар бөгөөд шуурхай байхаар бэлтгэл ажил хангаж байгаа. Ойролцоогоор нэг хүний бүртгэл таван минутаас хэтрэхгүй байхаар төлөвлөж байгаа гэв.