Задгай сансраас манай гарагт үзүүлэх заналхийлэл айсуй. НАСА-гийн одон орончдын сүүлийн үеийн судалгаагаар Апофис буюу хот сүйрүүлэгч хэмээх солир 2029 онд дэлхий гарагтай мөргөлдөх аюултай гэнэ. Хэдийгээр мөргөлдөх хувь маш бага ч гэлээ манай гарагт хэт ойртож ирэх солирын аюулаас сэрэмжлэх хэрэгтэйг эрдэмтэд анхаарууллаа. Эртний Египетийн харанхуй, үймээний бурхан гэгддэг Апофисийн нэртэй уг солир 370 метрийн диаметртэй бөгөөд дэлхий ирэх гурван жилийн турш тасралтгүй ажиглаж, чиглэлийг нь тогтмол тодорхойлж байх шаардлагатай аж. Эйфелийн цамхагтай ойролцоо хэмжээтэй Апофис солирыг анх 2004 онд илрүүлж, нарийн тооцоолсны дүнд дэлхийтэй мөргөлдөх аюултай гэж тодорхойлж байв. Нарийн яривал, уг солир дэлхийтэй мөргөлдөх магадлал 2.7 хувьтай ч сансар огторгуй дахь тэнэмэл биетүүдтэй мөргөлдөх, шүргэлцэх зэргээр аюулын зэрэг нэмэгдэж болзошгүй юм байна. Хэрэв дэлхийтэй хэт ойрхон зөрнө гэж үзвэл тэр зай нь 20,000 бээр буюу 36000 км бөгөөд манай гарагийн орбит дахь хиймэл дагуулуудтай мөргөлдөж, устгах аюултай юм. Эрдэмтдийн өмнөх тооцоогоор татах хүчний нөлөөнд орж, чиглэл нь өөрчлөгдсөөр Апофис солир 2036 онд дэлхийтэй шууд мөргөлдөнө гэж байсан шинэ тооцооллоор ойрын зуун жилдээ тийм аюулгүй нүүрлэхгүй гэж үзжээ.