Киргизстаны Үндэсний аюулгүй байдлын улсын хорооноос зохион байгуулалттай гэмт бүлэглэлийн гишүүн Кадырбек Досоновыг саатуулсан байна. Олон нийтийн дунд “Женго” хочоороо алдартай К.Досоновын гэмт хэргийн талаар үлгэр домог мэт яриа олон байдаг аж. Өмнө нь бусдыг айлган сүрдүүлэх, бусдын эд хөрөнгийг хууль бус аргаар өөрийн болгох, зэвсэгт дээрэм, бусдын эрүүл мэнд, бие мах бодод онц хохирол учруулах зэргээр олон тооны гэмт хэрэг үйлдэж, шоронгийн хаалга нэлээд хэдэн удаа татаж байсан этгээд юм байна. Мөн тэрбээр орон нутгийн эрх баригчидтай хамсаж, үнэ бүхий томоохон үйлдвэрийн байгууламж бусдаас булааж авах гэмт хэрэг үйлдэж байсан юм. Харин хоёр хоногийн өмнө Киргизстаны Үндэсний аюулгүй байдлын улсын хорооноос “Женго”-г баривчилж, түр саатуулсан талаар мэдээлжээ. Тус хорооны хэвлэлийн албанаас өгсөн мэдээллээр Ош муж болон Ош хотод үйл ажиллагаа явуулдаг ажил олгогчдын үл хөдлөх хөрөнгийг айлган сүрдүүлэх замаар булаан авчээ. Ингэхдээ дээрэмчид зарим хохирогчийн биед ноцтой гэмтэл учруулсан байна. Амь насанд нь халдах заналхийллээр айлган сүрдүүлж, Кара-Сүү дүүргийн Шарк тосгоны хөвөнгийн үйлдвэр, мөн тус дүүргийн Кашкар-Кыштак тосгон дахь ногооны хүлэмж, тосны үйлдвэр, тракторын засварын газрыг дээрэмдэж авсан байна. Түүнчлэн, хөнгөлөлттэй зээл гаргаж өгөх нэрийдлээр бусдын аж үйлдвэрийн байгууламжийг өөрийн нэр дээр шилжүүлж, хувьдаа завшсан гэж Киргизстаны Үндэсний аюулгүй байдлын улсын хорооноос мэдээллээ. “Женго” Кадырбек Досоновын гэрт нэгжлэг хийх үеэр гөлгөр амтай галт зэвсэг хоёр, олон тооны хутга, Бүгд найрамдах Киргизстан улсын Дотоод хэргийн яамны ажилтны үнэмлэх, тусгай зориулалтын аж үйлдвэрийн байгууламжийн бичиг баримт илрүүлэн хурааж авчээ. Хэрэгтэнг одоогийн байдлаар Үндэсний аюулгүй байдлын улсын хорооны түр саатуулах байранд саатуулж байна.