Одоо Еэ/Ye/ нэрээр явах болсон реппер Канье Уест өнгөрсөн ням гарагт Хятадын Хайкоу хотод тайзнаа гарсанд түүний хятад шүтэн бишрэгчид нүдэндээ ч итгэхгүй байна. Дэлхийн хамгийн их шүүмжлэл дагуулдаг оддын нэг тэрбээр БНХАУ-ын чанга хатуу дэглэмийн цензурыг давж, тус улсад тоглолтоо хийх зөвшөөрөл авсан нь туйлын ховор үзэгдэл олон сая хүний нүдийг орой дээр нь гаргалаа. Томоохон хотуудыг алгасч Хайнань арлын жижигхэн хотыг сонгосон ч гэлээ Еэгийн Хятадад хийсэн ганцхан удаагийн тоглолтын зар хэдхэн хоногийн өмнө гарч арав хүрэхгүй минутийн дотор 42,000 тасалбар борлуулж дөнгөжээ. Барууны урлагийнханд хатуу нүүр үзүүлдэг Бээжин энэ удаад хүлцэн тэвчсэн нь сүүлийн 16 жилд үзэгдээгүй өвөрмөц явдал юм. Энэ хугацаанд анх удаа Хятадад тайзнаа гарсан Еэгийн нэр хүнд ч огцом өсөж эхэлсэн талаар хэвлэлүүд мэдээлж байна. Гэхдээ БНХАУ-д үүсээд буй эдийн засгийн дарамттай байдал эрх баригчдад нь нэгийг бодогдуулж, Хятадыг зорих гадаадын уран бүтээлчдийн урсгалыг нээсний дохио боллоо гэж олон улсын ажиглагчид дүгнэж байна.