РТ, Россия Сегодня зэрэг ОХУ-ын төрийн мэдлийн хэвлэл бусдад нөлөөлөх суртал ухуулгын тактик баримталж байна гэж Мета буруутган Фейсбүүкт хориг тавьжээ. Тэд энэ шийдвэрээ Оросын тал нийгмийн сүлжээ ашиглан бусдын бодол санаанд нөлөөлөхийн тулд худал, ташаа мэдээлэл тарааж, хууран мэхлэх үйл ажиллагаа явуулж буй нь Фейсбүүкийн бодлоготой үл нийцнэ хэмээн тайлбарласан байна. Бүр тодруулбал “Сайтар бодож, эрэгцүүлсний үр дүнд ОХУ-ын төрийн мэдлийн хэвлэлүүдийн эсрэг хянан, сэргийлэх ажиллагаагаа нухацтай явуулж, дээр дурдсан нэр бүхий хэвлэлүүдийг дэлхийн хэмжээнд гадаадад нөлөөлөх үйл ажиллагаа явуулж буйг нь батлан тогтоосноор хориг тавих шийдвэрийг гаргав” гэж Мета компанийн албан ёсны мэдээлэлд онцолжээ. Энэ шийдвэр нь ойрын хугацаанд Инстаграм, УаттсАпп, Трээд зэрэг Мета компанийн мэдлийн платфорнуудад үйлчилж эхэлнэ. Ингэснээр ОХУ-ын төрийн мэдлийн хэвлэл, мэдээллийн агентлагууд Фейсбүүк тэргүүтэй дээр дурдсан нийгмийн сүлжээний платформуудаар мэдээ, мэдээлэл нийтлэх, түгээх боломжгүй болно гэсэн үг юм.