Өнгөрсөн амралтын өдрөөр Иранийн Өмнөд Хорасан мужийн нүүрсний уурхайд метанийн хийнээс үүдэлтэй дэлбэрэлт болж, одоогийн байдлаар 51 хүн амь үрэгдэж, 20 гаруй уурхайчин бэртэж, гэмтсэн гэж тус улсын төрийн мэдлийн мэдээллийн агентлаг дамжууллаа. Уг уурхайг Маданжү компани ажиллуулдаг бөгөөд уурхайн В, С жигүүрт метанийн хий алдагдсанаас дэлбэрэлт үүссэн гэж албаныхан тайлбарлаж байна. Өмнөд Хорасан мужийн захирагч Али Акбар Рахимигийн мэдээлснээр Иран улсын нүүрсний хэрэгцээний 75%-ийг тус бүс нутгаас нийлүүлдэг бөгөөд Маданжү тэргүүтэй 8-10 компани үйл ажиллагаа явуулдаг гэнэ.

Одоогийн байдлаар В жигүүрт аврах ажиллагаа явуулж дууссан. Харамсалтай нь тус жигүүрт ажиллаж байсан 47 уурхайчны 30 нь амиа алдаж, 17 шархаджээ. Харин С жигүүрт аврах ажиллагаа эрчимтэй үргэлжилж байна. Тус жигүүрт хуримтлагдсан метанийн хийн нягт өндөр учраас аврах ажиллагаа нэлээд саадтай учраад байгаа талаар аврах албаныхан учирлажээ. Дэлбэрэлт болох үеэр тус жигүүрт 69 хүн ажиллаж байсан байна. Тэднээс шархадсан 17 хүнийг эмнэлэгт хүргэсэн бол 24 хүн сураггүй байгаа аж.