Шри Ланкад өнгөрсөн ням гарагт Ерөнхийлөгчийн сонгууль болж, өдгөө 55 настай Анура Кумара Диссанаяке ялалт байгуулсан байна. Сүүлийн арваад жилийн турш Азийн хамгийн хүнд санхүүгийн хямралд автсан улс гэгдээд байгаа Шри Ланкад бугласан авлигатай тэмцэж, хэврэг эдийн засгаа бэхжүүлэх амлалт өгснөөр Марсист үзэл баримтлалтай улстөрч Ерөнхийлөгчөөр сонгогдсон нь олон улсын хэвлэлийнхний анхаарлыг татаад байгаа юм. Хэдийгээр бусад өрсөлдөгч шигээ улс төрийн арвин туршлагагүй ч гэлээ Диссанаяке санал хураалт эхэлсэн мөчөөс үнэмлэхүй тэргүүлсээр тус улсын одоогийн Ерөнхийлөгчийн үүрэг гүйцэтгэгч Ранил Викремесингхе, сөрөг хүчний лидер Сажит Премадаса нарыг ардаа орхиж, илт давуугаар ялалт байгуулжээ. Санал хураалтын хоёрдугаар үе дуусаж, ялалтаа баталгаажуулсны дараа Диссанаяке “Бид энэ улсыг орвонгоор нь өөрчилж, тогтвортой Засгийн газар байгуулж, улам урагш алхаж чадна. Ерөнхийлөгч бол миний хувьд ажил үүрэг бус өндөр хариуцлага юм.” гэж ажиллах зарчмаа тунхагласан байна. Амур Кумара Диссанаяке 5.6 сая санал буюу 42.3 хувийн санал авсан бол С.Премадаса 32.8 хувь, Р. Викремесингхе 17 хувийн санал авч эрэмбэлэгдсэн байна.
Шри Ланк улсын хувьд түүхэндээ анх удаа сонгуулийн санал хураах хоёрдугаар шатыг зохион байгуулсан нь энэ байлаа. Тус улсын хуульд зааснаар гурван нэр дэвшигчийн аль нэг нь 50%-иас дээш санал авахгүй бол дахин санал хураах ажиллагаа зохион байгуулдаг юм. Ийм учраас хоёр дахь санал хураалтаар хамгийн их дэмжлэг авсан нь дараагийн Ерөнхийлөгчөөр сонгогджээ. Орон нутгийн сонгуулийн хорооноос мэдээлснээр 17 сая сонгогчийн 75% нь санал хураалтад оролцсон ирцтэй байна.