Украинд цөмрөн орж, хэдийн нэр хүнд нь дэлхий даяар унаад байгаа ОХУ-ын Ерөнхийлөгч В.Путин өчигдөр дахин нэг хэл амны бай болох үйлдэл хийжээ. Утгын хувьд тус улс цөмийн зэвсэг ашиглах журмаа шинэчилж, аль нэг гадны орноос тус улсад энгийн зэвсэг, техник ашиглан халдсан ч цөмийн зэвсгээр хариу барих санал гаргасанд байгаа юм. Бүр тодруулбал, цөмийн зэвсэгтэй улсын дэмжлэгтэй цөмийн зэвсэггүй улс Оросын нутагт энгийн зэвсгээр зэвсэглэн халдвал хариуд нь цөмийн бөмбөг ашиглах боломжийг холбогдох албан ёсны бичиг баримтанд тусгах нь зөв гэж В.Путин үзсэн байна. Учир нь тэрбээр дээрх явдалыг хамтарсан цохилтод тооцдог хэмээн тайлбарлажээ. Мөн ОХУ-ын цорын ганц холбоотон гэж болох Беларусь улсыг хамгаалахдаа цөмийн зэвсэг ашиглах нь зүйтэй гэж В.Путин нэмж хэлсэн байна.

Олон улсын ажиглагчдын үзэж буйгаар дээрх санал нь барууны орнууд Украинд нийлүүлсэн алсын тусгалтай пуужинг ашиглах эрхийг өгөх хандлагатай яриа гарсны хариуд Москвагаас авч буй хариу арга хэмжээ бололтой. Иймд, талууд нөхцөл байдлыг харгалзан үзэж, зэр зэвсэг ашиглах тал дээр дахин нэг бодолцож үзэхгүй бол оросууд Украинд цөмийн зэвсэг хэрэглэх нөхцөл үүсчих вий хэмээн учир мэдэх хүмүүс анхаарууллаа.

Гэтэл Украинийн Ерөнхийлөгчийн Тамгын газрын дарга Андрей Ермак “Орос улсад цөмийн зэвсгээс өөр дэлхийг айлгах юу ч байхгүй. Ядахад тэднийх нь нэг нь ч ажиллахгүй” гэж В.Путиний санаачлагын хариуг барьжээ.