Одоогоос арав гаруй жилийн өмнө БНАСАУ-аас зугтаж, БНСУ-д амьдрах болсон нэгэн этгээд автобус хулгайлж, Умард Солонгос руу зугтахыг завдах үеэрээ баривчлагджээ. Өмнөд Солонгосын Гиёонги Пугбу мужийн цагдаагийн газраас мэдээлснээр гуч гаруй насны эрэгтэй хулгайлсан автобусаараа энгийн иргэдийн зөвшөөрөлгүй нэвтрэх эрхтэй, хилийн шалган нэвтрүүлэхийн сүүлчийн цэг Тонгил гүүрэн дээгүүр 800 метр орчим яваад хил хамгаалахынханд саатуулагдсан байна. Солонгосын хойгийг хоёр хуваадаг цэрэггүй бүстэй маш ойр учир тухайн зурвасыг цэргийнхэн маш өндөр хараа хяналтан дор хамгаалж байдаг юм. Умард руу эргэж зугтахыг завдаад баригдсан этгээд 2011 онд Өмнөд Солонгост дүрвэн ирж амьдарсан бөгөөд өдгөө 35 настай. Тэрбээр цагдаад өгсөн мэдүүлэгтээ өдөр, шөнөгүй ажилласан ч тогтсон орон гэртэй болж чадаагүй. Эдийн засгийн маш хүнд байдалтай амьдардаг. Ганц бие, мөн нутагтаа үлдсэн гэрийнхнийгээ үргэлж санадаг зэрэг шалтгаан нь эргэж Умард руу зугтах сэдэл төрүүлсэн гэж учирласан байна.

Умардаас зугтаж, Өмнөдөд ирсэн хүмүүсээс эргэж буцах нь маш ховор тохиолддог. Ямартай ч хоёр Солонгосын дайн 1953 онд гал зогсоосноос хойш БНАСАУ-ын 34,000 хүн БНСУ-д зугтан ирсэн бол ердөө 30 хүн буцаж явсан гэдэг статистик байна. Тэдний буцаж явах шалтгаан нь Өмнөд Солонгосын нийгэмд дасан зохицож чаддаггүйтэй нь холбоотой аж.