Хүний амьдралыг нарийвчлан судалдаг геронтологич Жей Оланшский болон түүний хамтран зүтгэгчид 30 гаруй жилийн өмнө хүн төрөлхтний урт наслах чадамж буурснаар өнөөгийн хүүхдүүд ихдээ л 85 хүртэл насална, магадгүй 1-5% нь л 100 хүрнэ гэдэг онол дэвшүүлж байсан. Хэдийгээр энэ нь сонсоход тун таагүй мэдээ боловч анагаах ухааны ололт, эмчилгээ сувилгаа хүнийг урт наслахад үзүүлэх нөлөө улам буурсаар байгаа гэв. Чикаго дахь Иллинойзийн их сургуулийн Нийтийн эрүүл мэндийн сургуулийн эпидиомологи, биостатистикийн профессор Жей Оланшскийн багийнхан Австрали, Франц, Хонг Конг, Итали, Япон, Өмнөд Солонгос, Испани, Швед, Швейцарь, АНУ зэрэг улсад явуулсан судалгааны хариуг “Nature Aging” сэтгүүлд нийтэлжээ. Өнөөдрөөс 34 жилийн өмнө дэвшүүлсэн онолыг баталсан уг судалгаанд дурдсанаар 2019 онд төрсөн хүүхдүүдийн 5.1 хувь нь 100 наслах магадлалтай. Энэ хувийн ихэнхийг эмэгтэчүүд эзлэх бол эрчүүдийн хувьд 1.8%-тай л байна. Шинжлэх ухааны ололтоор хүн төрөлхтний наслах хугацаа уртасна гэж таамагладаг байсан боловч яваандаа тэдгээрийн хүнд үзүүлэх сайн нөлөө багассаар байх тул ойрын ирээдүйд хүний дундаж нас буурна. Анх 1990-ээд онд хүний нас уртасна гэж үзсэнчлэн өнөөдрийг хүртэл таамагласны дагуу бид урт наслах болсон. Судлаачдын баталж буйгаар хүн урт наслахад архи, тамхины нөлөө төдийлөн их биш. Жишээ нь, дэлхийд хамгийн урт насалсан эмэгтэй 122 хүрсэн ч бүх насаараа архи, тамхи хэрэглэдэг байсан. Олон улсад явуулсан ажиглалт судалгаанаас үзэхэд 100 насалсан хүний тоо сүүлийн 30 жилд огцом нэмэгдсэн ч хүний урт наслах явц ирэх арван жилүүдэд улам цөөрнө. Энэ нь ердөө л хүний биеийн бодисын солилцоо удаашрах, эд эсүүд үхжих, нас ахихын хэрээр нөхөн төлжих чадвар доройтдогтой л холбоотой гэж тайлбарлав.