ОХУ-ын тал Донецк мужийн Вуледар хотыг эзлэхдээ тус хотыг хамгаалж байсан украйн цэргүүдээс арав дахин их хүчээр цохилт өгсөн гэж 72-р Механикжуулсан бригадын захирагч Олександр Охрименко орон нутгийн “Главком” мэдээллийн хөтөлбөрт өгсөн ярилцлагадаа онцолжээ. Оросын цэргүүд хотын тал бүрээс жигүүрлэн довтолсоор төвийн бүсэд нэвтэрсний дараа буюу энэ сарын 02-ны өдөр Киев Вуледар хотоос цэргээ татах шийдвэр гаргахад хүрчээ. О.Охрименкогийн 72-р Механикжуулсан бригад дайн эхэлснээс хойш буюу сүүлийн хоёр жил гаруйн турш Украинийн гол түшиц газруудын нэг Донецк мужийн өмнөд хэсэгт орших Вуледар хотыг хамгаалж байжээ. Гол түшиц гэдэг утгаараа Вуледар хот нь 2022 оноос хойш Оросын довтолгоонд хамгийн ихээр өртсөн нутаг юм. О.Охрименко цааш нь ярихдаа “ОХУ-ын Тусгай гвардын мото буудлагын 36-р анги, 39, 57-р бригад, Тусгай буудлагын 91-р хороо тэргүүтэй их хэмжээний цэргийн хүчийг Вуледарт цохилт өгөхдөө давшуулсан. Дайсны хүч олон тооны танк, явган цэрэг тээвэрлэгч, их бууны анги, танк эсэргүүцэгчээр зэвсэглэсэн байв” гэжээ. Владимир Путин Донецк мужийн Вуледар, Покровск, Торецк зэрэг чухал хотуудыг заавал буцаан авах тушаал буулгасны дагуу Оросын Зэвсэгт хүчин Украинийг хүний олноор түрэмгийлэх болоод байгаа юм.