АНУ-гаас Турк руу нислэг үйлдэж явсан Туркиш Эйрлайнсын ТК204 нислэгийн Эйрбус350 онгоцны ахмад гэнэт ухаан алдаж, улмаар нас барж, хоёрдугаар болон туслах нисгэгч жолоодлогыг гартаа аван Нью-Йорк хотод ослын буулт хийсэн байна. Ахмад Илсехин Пеливан 59 настай байсан бөгөөд 2007 оноос хойш ажиллахдаа нэг ч удаа алдаа дутагдал гаргаж байгаагүй гэнэ. Мөн нисгэгч нар 12 сар тутамд эрүүл мэндийн үзлэгт ордог учир цоо эрүүл хүн байсан гэнэ. Тэр дундаа 40-өөс дээш насны нисгэгчид зургаан сар тутамд эрүүл мэндийн үзлэгт нэмэлтээр хамрагддаг журамтай юм байна. Ахмад Илсехин Пеливаны зуурдаар нас барсан үхлийн шалтгаан одоогоор тодорхогүй гэж ВВС мэдээлэв. Нисгэгч агаарт зуурдаар нас барах явдал маш ховор тохиолддог үзэгдэл гэнэ. Ийм тохиолдол өмнө нь нэг удаа бүртгэгдсэн нь 2015 онд Американ Эйрлайнсын 57 настай нисгэгч тодорхойгүй байдлаар гэнэт нас баржээ. Болзошгүй эрсдэлээс сэргийлэхийн тулд Европын иргэний нисэхийн аюулгүй байдлын газар олон зорчигч тээвэрлэдэг том онгоцнуудад ганцаарчилсан жолоодлогын систем боловсруулж байгаа гэв. Уг системийн тусламжтайгаар нислэгийн үеэр багийн бусад гишүүд ээлжлэн амрах, албан үүргээ гүйцэтгэх чадамж сулрахаас сэргийлэх, үйл ажиллагааны аюулгүй байдлыг хянах, хангах боломжийг нээж өгснөөр нисгэгчдийн ажлын ачаалал хөнгөрч агаарт амиа алдах эрсдэл буурах юм байна.