Хуучны уран барилга, шар айргаараа дэлхий дахинаа алдаршиж, Европын зугаа цэнгэлийн нийслэл хэмээгддэг Чехийн Прага хот “архичин” жуулчдаас залхан хөөж эхэлсэн байна. Учир нь гэвэл тус хотын удирдлагууд гадны архичид хэт ихээр цугларч үүр цайтал наргиж цэнгэдэг нь иргэдийн амьдралын чанарт хорт уршиг дагуулж байна гэж үзсэн учир уушийн болон шөнийн цэнгээний газруудыг эрт хааж байхаар шийдвэрлэжээ. Ингэснээр жуулчдын урмыг хугалж, дээр дурдсанчлан зугаа цэнгэлийн нийслэл нэрнээсээ сална гэж олон улсын хэвлэлүүдээр мэдээлж байна. Прага хотын захирагчийн орлогч Жири Посписил “архичин жуулчдын наргих цагийг багасгаж, оронд нь илүү соёлтой, чинээлэг жуулчдыг татах бодлого баримтална” гэж АФП мэдээллийн агентлагт ярьжээ. Польшийн Засгийн газар агаарын тээврийн салбартаа хөрөнгө хаяснаар сүүлийн хориод жилд тус улсыг зорих жуулчдын тоо огцом өсөж, аялал жуулчлалын салбарт тэсрэлт гарсан бөгөөд гол төлөв уух дуртай, ганц бие болон удахгүй гэрлэх гэж буй хүмүүсийн очих дуртай чиглэл болсон байна. Уушийн болон шөнийн цэнгээний газруудыг эрт хаах шийдвэрийг ЮНЕСКО-гийн хамгаалалтанд орсон Хуучин хотын талбай, Прага цайз, Чарльз гүүр зэрэг түүхэн дурсгалт газруудын оршин суугчид жуулчдын дуу чимээ ихтэйд мэдүүлсэн гомдолд үндэслэн гаргасан гэж холбогдох хүмүүс нь тайлбарлалаа. Хотын захирагчийн албанаас мэдээлснээр Прага 1 тэргүүтэй түүхэн дурсгалт хуучны дүүргүүдэд уушин газрууд өглөөний 06 цаг хүртэл ажилладаг байсныг болиулах шийдвэр ирэх сарын 01-нээс хэрэгжиж эхлэх юм байна.