Урд хөршийн нийслэл Бээжин хот болоод захиргааны тусгай бүс Хонг Конгийг холбосон хурдны зам дээр дэлхийд анх удаа хүний оролцоогүйгээр засварын ажил хийж, асфальтаар хучсан байна. Дэд бүтцийн салбарт технологийн томоохон дэвшил авч ирсэн энэ төслийг Хубей коммуникейшн инвестмент компани удирдаж, Хятадын төмөр замын 11-р товчоо Лиаонин Гуотай зам, гүүрийн компанитай хамтран гүйцэтгэсэн байна. Төслийн ажлыг гүйцэтгэсэн машин механизмыг Сани Группээс гаргаж, дэлхийд анх удаа хүний оролцоогүйгээр өргөн бөгөөд урт зам шинэчлэн засварлаж, асфальтаар хучсанаараа онцлог басхүү дэд бүтцийн салбарт технологийн үсрэлт хийсэн явдал болж байна. Нийт 158 км урт зам нь 20 метрийн өргөнтэй. Хучих ажилд 13 тоннын өөрөө явагч ган индүү зургаа, 30 тоннын резинен индүү гурвыг ашиглажээ. Ингэхдээ хүнд механизмуудыг сүүлийн үеийн програм хангамжаар удирдаж, нарийвчилсан стандартөгөгдлийн дагуу замын асфальтны өргөн болоод зузааныг тохируулсан байна. Энэхүү төсөл нь амжилттай хэрэгжсэн тул уламжлалт аргаар зам тавих явцад ялгардаг нүүрстөрөгчийн бохирдлыг бууруулах, нэгэнт хүний оролцоо үгүй учраас зам засварын ажлын үеэр гарах хөдөлмөрийн аюулгүй байдлын эрсдэл буурах, төлөвлөгөөт зам засварын ажлуудыг хийж, гүйцэтгэх хугацааг хэмнэх давуу талтай гэж олон улсын хэвлэлүүдээр онцолж байна. Ухаалаг системийн ачаар зам засварын үед учирч болохыг саадыг автомат ажиллагаатай дрон, роботууд тусгай долгионоор дамжуулан илрүүлж, тухай бүрд нь тэгшлэх, хусах, нүх бөглөх зэргээр өндөр нарийвчлалтай ажиллаж байжээ.