Өмнөд Солонгосын тагнуулын газраас БНАСАУ-ын зэвсэгт хүчний 1,500 цэрэг усан онгоцоор ОХУ-д хүрсэн талаар мэдээлэв. Тэдний зорилго цэргийн сургуулилт хийх бөгөөд Москвагаас Украинд явуулж буй дайны ажиллагаанд оролцох, туслах хүч болно гэлээ.

БНСУ-ын Үндэсний тагнуулын газрын мэдээлэлд дурдсанаар Умард Солонгосын тусгай хүчний цэргийг тээвэрлэхээр Оросын долоон усан онгоц энэ сарын эхээр Пхеньянд ирээд байжээ. Сүүлийн үед томоохон тээврийн онгоцнууд Владисвосток, Пхеньяны чиглэлд нислэг үйлдэх нь олширсон хоёр орон хоорондоо туслалцах ажиллагааг эрчимжүүлсний илрэл гэж тэд тайлбарлав.

Умардын талаас Украинийн дайнд нэмэлт хүч илгээсэн нь анхны тохиолдол биш ба өмнө нь илгээсэн тусгай хүчний алба хаагчдыг Ким Чен Ун өөрөө сонгон шалгаруулсан аж. Энэ талаар ч Украинийн Ерөнхийлөгч Володимир Зеленский анхааруулж байсан бөгөөд ОХУ, БНАСАУ-ын хамтын ажиллагаа улам өргөжиж буй явдалд анхаарал хандуулахыг олон улсын удирдагчдаас хүссэн удаатай. Мөн тэрбээр өнгөрсөн долоо хоногийн пүрэв гарагт Брьюссель хотод болсон НАТО-гийн чуулган дээр Умард Солонгосын тал 10,000 хүний бүрэлдэхүүнтэй хуурай газрын цэрэг болон техникийн мэргэжилтнүүдийг бэлтгэж, Украин руу илгээхээр зэхэж байгаа талаар анхааруулсан байна.