В.Путины эсрэг тэмцлээрээ алдартай, ОХУ-ын сөрөг хүчний лидерүүдийн нэг агсан, тулаант видео тоглоомд хүртэл мөнхөрсөн Алексей Навальныйг хорьж байсан шоронгийн удирдлага болон дээгүүр албан тушаалтны хоорондоо бичсэн и-мэйлийг нэрээ нууцалсан эх сурвалж задалжээ. Биеэ даасан хэвлэл гэдгээрээ алдартай Медуза сонинд гарсан и-мэйлүүдээс харахад шоронгийн хуягууд санаатайгаар тэсвэрлэхийн аргагүй хүнд нөхцөл үүсгэж, А.Навальныйг байж болох бүхий л аргаар тамладаг байсан нь ил болсон байна. Ноцтой мэдээлэл агуулсан олон тооны и-мэйлийг Холбооны засан хүмүүжүүлэх албаны хуулийн хэлтсийн дарга Илья Круглышев, ОХУ-ын төвийн Владимирийн тойргийн ИК-6 засан хүмүүжүүлэх газрын ажилтнууд бичжээ. Жишээ нь, 2023 оны аравдугаар сард шоронгийн харгалзагчийн бичсэн нэгэн и-мэйлд А.Навальныйгийн салхилах эрхийг хассан талаар маш тодорхой бичсэн байна. И.Круглышевийн бичсэн и-мэйлд шоронгийн харгалзагч нар Навальныйгийн хувийн шууданг уншиж, ар гэр, найз нөхөд, хамтран зүтгэгчидтэйгээ утсаар холбогдоход яриаг нь чагнах, өмгөөлөгчтэйгээ солилцсон хуулийн бичиг баримтуудыг шалгах, Навальныйгийн нэрийн өмнөөс олон нийтийн сүлжээнд оруулсан хамтрагчдынх нь нийтлэлүүдийг устгах зэргээр хатуу хянадаг байжээ. Мөн эрүүл мэндтэй холбоотой олон зөрчил илэрсэн нь түүнийг үхэлд хүргэсэн байж болзошгүй гэж Медуза таамаглажээ. Учир нь, Алексей Навальный даралт ихсэх өвчтэй байсан ч биеийн байдал нь муудахад шоронгийн шийтгэл хэмээн эм өгөлгүй, тамлан зовоодог байсан нь ийнхүү ил боллоо. А.Навальный нь биеийн байдал нь дордсоор энэ оны хоёрдугаар сарын 16-нд нас баржээ. Харин өнгөрсөн сард ОХУ-ын хараат бус хэвлэл The Insider-ийнхан түүнийг шоронд хордуулсан нотлох баримтыг олон нийтэд дэлгэж байв.