Энэтхэгийн эрх баригч Бхаратия Жаната Нам/БЖН/-ын нөлөөний хэмээдэг хоёр мужийн захиргаа шүлс, ялгадас агуулсан бохир хоол хүнс үйлдвэрлэсэн, худалдсан этгээдэд өндөр хэмжээний торгууль оногдуулж, шоронд хорих шийтгэл оноох хуультай болохоор ярьж байна. Тодруулбал, тус улсын умард нутгийн Уттараханд мужид хууль зөрчигч “заваан этгээд”-ийг 100,000 рупи буюу 920 ам.доллараар торгох хууль санаачилсан бол хөрш Уттар Прадеш мужийн эрх баригчид хүнсний аюулгүй байдал хангах үүднээс хуулиа чангатгахаар төлөвлөж байгаа юм. Шулуухандаа, хоолонд нулимсан этгээдийг хүндээр шийтгэнэ гэсэн үг юм. Гэтэл энэ нь иргэдийн дунд эгдүүцэл төрүүлж, олон нийтийг хамарсан эрх баригчдын шийдвэртэй холбоотой маргаан үүсгэжээ.

Дээрх хоёр мужийн захиргаа ийм хатуу хууль батлахаар шийдвэрлэсэн нь онлайнаар тархаад буй гудамжны түргэн хоолны үйлчилгээ, зоогийн газруудад хоол руугаа нулмиж байгаа болон нэгэн эмэгтэй гэртээ бэлдэж буй хоолонд шингэн ялгадсаа хольж буй бичлэг тархсантай холбоотой аж. Зарим тал дээрх хуулийг баталснаар лалын шашинтнуудын эсрэг явуулж буй компанит аян идэвхжинэ хэмээн шүүмжилжээ. Гэхдээ албаныхны явуулсан шалгалтаар дээр дурдсан эмэгтэй нь лалын шашинтан бус хинду шашинтан гэдэг нь тодорхой болсон учир олон нийтийн дунд бий болсон шүүмж үндэслэлгүй хэмээн тайлбарлаад байна.

Энгийн иргэдээс гадна сөрөг хүчний улстөрчид, салбарын мэргэжилтнүүд шинээр батлах хуулийн үр нөлөө сайн гарна гэдэгт эргэлзэж буйгаа илэрхийлж, хүнсний үйлдвэрлэл эрхлэгчдийг хааж бооход ашиглах хэрэгсэл болж мэдэх эрсдэлтэйг ч сануулжээ. Мөн Энэтхэгийн буухиа сонинд гарсан шүүмжлэлд “Дээрх шийдвэр нь ариун цэвэр, бохирдолын нэр барьж, хэдийн эмзэг болсон үндэсний цөөнхийг нэг бүрчлэн нухчин дарах, агнах намнах хэрэгсэл болох нь мэдээж. Энэтхэг бол олон үндэстэн, шашин сүлэлдэж оршдог, кастын системтэй. Энэ ч утгаараа хоол хүнс, түүнийг бэлтгэх зан заншил нь тухайн үндэстэн, шашинтан, давхаргаа дагаад янз бүр байдаг. Зарим хэсэгт энгийн үзэгдэл байдаг жишиг бусад давхаргынхантай мөргөлдөх нь бий. Тэглээ гээд хүнсний аюулгүй байдал нэрээр шашин хооронд ямар нэгэн зөрчилдөөн үүсгэх нь улс, эх орны тогтвортой байдалд сөрөг нөлөө үзүүлэх аюултай” хэмээн онцолжээ.

Энэтхэгийн Хүнсний аюулгүй байдал хамгаалах газрын мэдээлснээр тус улсад нэг жилд 6,000,000 хүн хүнсний бүтээгдэхүүнээс гаралтай халдвар авч тэднээс 400,000 нь амиа алддаг гэсэн ч олон нийтийн зүгээс улс орны бүрэн бүтэн байдлыг хадгалах нь чухал гэж үзэж буй тул хоол руу нулимсан этгээдийг торгох хуулийг эсэргүүцэж буй гэж ойлгож болох нь.