Монако гэдэг нэр кино, зурагтын нэвтрүүлгээр бишгүйдээ л их цуурайтдаг. Энэ бол Италийн Лигурия мужийн Газар дундын тэнгисийн эрэгт орших аялал жуулчлал, тансаг зэрэглэлийн үйлчилгээтэй зочид буудал, зоогийн газар, казино, үнэтэй брэндүүдийн дэлгүүртэйгээрээ алдаршсан газар. Тэгвэл үүний бэсрэг хувилбарыг АНУ-ын Флоридагийн эрэгт барих гэж буйгаа Рилейтэд группийнхэн мэдээллээ. Төсөл боловсруулах багийн гаргасан тооцоогоор бүтээн байгуулалтын ажилд хоёр тэрбум ам.долларын төсөв баталсан талаар захирлууд нь мэдээлсэн байна. Бүр тодруулбал Форт Лодерейлд орших Бахия Мар далайн зогсоол ойрын ирээдүйд зочид буудал, өндөр цамхаг, элсэн дээрх цэнгээний газар, зоогийн газар, жижиглэнгийн наймааны гудамжтай цогцолбор болон өндийх юм. “Форт Лодердейл далайн эргийн үзэмж, дэлхийд дээгүүрт орох гүн завины зогсоолтой боловч таван одтой амралтын газар, тансаг зоогийн газар л алга. Тиймээс бид энд дутагдсан бүгдийг гүйцээж, “Мини Монако”-г байгуулна” гэж Рилейтэд группийн гүйцэтгэх захирал Ник Перез хэвлэлд ярьжээ. Уг төслийг санаачлагч тэрбумтан Хорхе Перезийн Рилейтэд групп бүтээн байгуулах хамтрагчаараа Тейт Капитал, Рок Аквикзишнс компанийг сонгосон гэнэ. Төлөвлгөөнд тусгаснаар 40 акр талбай эзлэх ус болон газар дээр 200 өрөөнтэй Сэйнт Гежис зочид буудлыг одоо байгаа Дабль Трий зочид буудлыг буулган суурин дээр нь барих аж.