ОХУ-ын шүүхээс Гүүгл компанийг тус улсын хэвлэл мэдээллийн хэрэгслүүдэд хориг тавьсных нь хариуд 20 дециллион доллараар торгох арга хэмжээ авсан. Энэхүү дециллион гэх тоо нь монгол тоогоор хорин их тунамал юм. Гэтэл Гүүгл компанийн бодит үнэлгээ дөнгөж хоёр их наяд ам.доллар. Дэлхийн банкны тооцоогоор дэлхийн ДНБ 100 их наяд ам.доллар орчим гэдэг. Тэгэхээр Оросын талаас энэ дэлхий дээр байхгүй их мөнгө нэхсэн болж таарлаа. Гүүгл компани ч тийм хэмжээний мөнгийг мөд төлбө барагдуулахгүй нь ойлгомжтой. Энэ сүржин явдал Орос, Украинийн сөргөлдөөнөөс эхлэн Царград, РИА ФАН зэрэг ютүб сувгийг хааснаас эхтэй гэж үзэж болох юм. Улмаар 2020 онд Оросын шүүх АНУ-ын технологийн аварга компанийг үг хэлэх эрх чөлөөнд халдсан гэх үндэслэлээр гомдол мэдүүлж заргаа аваад шийдвэрт заасан хугацаанаас хоцорвол хоногт хоёр дахин үржигдэх зарчимтай 100,000 рублийн торгууль оногдуулснаар хүний санаанд багтамгүй дээрх тоонд хүрэх шалтгааны эхлэлийг тавьсан түүхтэй. Товчоор бол торгууль явсаар дөрвөн жилийн хугацаанд 20 их тунамалд хүрчээ. Хэрэв энэ янзаараа үржигдсээр байвал 219 хоног буюу дахиад дөрвөн жилийн дараа Гүүглийн торгуулийн дүн 101 оронтой тоонд хүрнэ.