Хөрөнгө чинээ, тансаг хурим, найраараа Энэтхэг төдийгүй дэлхий дахины нүдийг орой дээр нь гаргадаг Азийн хамгийн баян эр Мукеш Амбанигийн гэр бүл бас нэгэн зүйлээрээ бусдаас ялгардаг. Тэр бол тэдний гэрийнхэн бүгд нэр дор амьдардаг Мумбай хот дахь Антилия хэмээх 27 давхар, 37,161 мкв талбайтай дээд зэрэглэлийн орон сууц юм. Эсвэл харш ч гэсэн ч болно. Анх 2006-2010 онд хоёр тэрбум доллараар барьсан уг үл хөдлөх хөрөнгийн үнэлгээ нь өнөөдөр 4.7 тэрбум долларт хүрчээ. Мумбай хотын чимэг болсон энэ асар үнэтэй сууцны нэг сарын хэрэглээний зардлыг сонссон хэн ч мэл гайхам аж. Чамин ганган гэрлэн чимэглэлтэй энэ орон сууц сард 637,240 кВц цахилгаан зарцуулдаг гэнэ. Үүнийг мөнгөн дүнд шилжүүлбэл 7,069,488 рупи. Энэ нь 83,966 ам.доллар буюу 286,715,979 төгрөгтэй тэнцэнэ. Өөрөөр хэлбэл, 637,240 кВц нь 170 ширхэг Тесла Модель 3 загварын машиныг тус бүр 70 удаа бүрэн цэнэглэж, дэлхийн экваторын бүсийг нэг, нэг удаа тойроход хангалттай хүрэлцэх цахилгаан юм.
Сонирхуулахад, Мукеш Амбанигийн Антилия орон сууц 27 давхар гэх боловч нийт өндөр нь энгийн барилгын стандартаар 60 давхартай тэнцэхүйц юм байна. Орон сууц дотор 168 машины цуглуулга, усан сан, халуун рашаан, эрүүл мэндийн төв, сүм, өндөр хурдны цахилгаан шат ес гээд хүний хэрэглээ цөм багтжээ. Дээр нь, Антилияд 600 хүн ажиллаж, таван одтой зочид буудлын жишгээр гэрийн эздэд үйлчилдэг байна.