АНУ-ын Төлөөлөгчдийн ордоны Дэд хорооны сонсгол өчигдөр болж, бүх нийтийн аюулгүй байдал, харь гарагаас үзүүлж болзошгүй заналхийллийн талаар хэлэлцлээ. Сонсголд оролцсон АНУ-ын Тэнгисийн цэргийн адмирал асан Тим Галлодет арав гаруйн жилийн өмнө үгээр тайлбарлахын аргагүй хачин жигтэй явдлын бичлэг үзэж байсан гэв. Хэдийгээр НАСА болон бусад албаныхан харь гарагийнхан байхгүй гэж албан ёсоор мэдэгддэг ч Т.Галлодет үгүйсгэсэн хариу өгч бид энэ сансар огторгуйд цор ганцаараа биш гэдгийг хариуцлагатайгаар мэдэгджээ.

Түүнээс гадна Агаараас учруулж болзошгүй заналхийлэл илрүүлэх хөтөлбөрийн захирал асан Люү Элизондогийн өгсөн мэдүүлэг анхаарал татлаа. Учир нь, тэрбээр харь гарагийнхан цэргийн онгоц дагаж, хүн төрөлхтний өнөөгийн агаар нисэх хүчний чадлаас хэдэн зуу дахин давсан хурдаар нисэж буйг харуулсан шинэ бичлэг дэлгэсэн аж. Л.Элизондогийн мэдүүлснээр үл ойлгогдох агаарын үзэгдэл нь үнэн бодит бөгөөд АНУ болон бусад орны Засгийн газрын бүтээл бус дэвшилтэт технологи дэлхийн өнцөг булан бүр дэх цэргийн байгууламжуудыг байнга хянаж, харийнхан бидний дунд амьдардаг нь худал биш зүйл гэнэ. Жишээлбэл, харь гарагийн хөлгүүдийн нисэх хурдыг тооцоолж үзэхэд 3000G хүрч байсан нь хүний биеийн хурд тэсвэрлэх чадамжаас хэдэн зуу дахин давсан үзүүлэлт юм. Хүний бие ердөө 9G хүртэлх хурдыг тэсвэрлэж чаддагийг шинжлэх ухааны туршилтаар баталсан билээ.