“Исгэрсэн суман дундуур амь зулбан зугтах дөнгөж эхлэл нь байлаа. Түүнээс хойш арван жил хүчирхийлэл, шорон, яргалал гээд үй түмэн зовлон туулсан. Азаар Монголын цөлд амь аврагдсандаа одоо ч би талархаж явдаг” гэж Умард Солонгосын дүрвэгч Пак Жи Хюн нүдэндээ нулимс цэлэлзүүлэн дурсан ярьжээ.

Тэр бол хатуу чанга дэглэмтэй, дэлхий дээр цөөхөн үлдсэн коммунист улсын нэг БНАСАУ-гаас хоёр ч удаа оргож, өнөөдөр аз жаргалтай амьдарч байгаа зоригт эмэгтэй юм. Их өлсгөлөнгийн үе буюу 1997 онд авга ахыгаа өлсгөлөнгөөр үхэхийг харсан Пак Жи Хюн, аавынхаа захиасаар дүүгээ дагуулан оргожээ. Хятадад очоод хүний наймааны золиоч болж, харгис, хүчирхийлэгч нөхрийн гарт очоод зогсохгүй, түүнийг хүнээс их хэмжээний мөнгө зээлж ээждээ өрийн барьцаанд орчихов. Түүнийг арайхийн амьд гарч ирэхэд нь ердөө 5,000 юаниар худалдсан нь тэр аж.

Харгис нөхрийн гарт тарчилж, хоногт 14 цаг тасралтгүй ажиллаж, нэг хүүтэй болсон түүнийг Хятадын цагдаа нар баривчилж, Умард руу буцаагджээ. Нэгэнт улс төрийн хоригдол болсон Пак Жи Хюн дахин зургаан жил шоронд тэвчихийн аргагүй зовсоны эцэст хүүтэйгээ уулзахын тулд сайн дураараа хүний наймаачдын гарт орж, дахин Хятад руу зарагдлаа. Арав гаруй жилийн энэ их зовлон дундуур хүүтэйгээ дахин уулзаж чадсан нь түүний амьдралд тохиосон хамгийн том баярт үйл явдал байв.

Ингээд хүүтэйгээ эсэн мэнд уулзсан дүрвэгч эмэгтэй Бээжин дэх БНСУ-ын Элчин сайдын яаманд хандсан боловч бичиг баримтгүйн гэх шалтгаанаар үл тоогджээ.

Аргаа барсан тэр Элчин сайдын яаманд танилцсан хэд хэдэн дүрвэгчийн хамт Монгол Улсыг зохироох санаа нэгтэйгээр зориглож, аян замдаа гарав. Хүү нь зургаахан настай, томчуудын адил хурдан гүйж чадахгүй тулд тэд алгуурхан явсаар Монголын хилд тулж ирсэн гэнэ. Хятадын хилчдэд баригдвал буцаад л аймшигт шорон руу ачигдах учраас дүрвэгчид өмнөхөөсөө хашир, сэрэмжтэй нуугдан явсаар хил давж чаджээ. Ингэхдээ дүрвэгчдийн дунд явсан нэг эр Хятад цагдаагийн машин хулгайлж, ээж, хүү хоёрыг аван хилээр гарсан нь хожим түүний нөхөр болж, тэд хоёр хүүхэд төрүүлж, өнөр өтгөн гэр бүл болсон түүхтэй.

Монголын хил давсны дараа халуун говьд хэдэн өдөр явж, ус, хүнс нь дууслаа. Хааш, хаашаагаа хэдэн арван километрт эзэнгүй цөлд ядарч туйлдсан дүрвэгчид ангаж үхэхийн даваан дээр монгол хилчидтэй тааралдаж, амь аврагдсан байна. Тэд Монголд хэдэн сарыг өнгөрөөсний дараа Бээжин рүү буцаж, Пак Жи Хюн тэндээс нөхрийн хамт Англи улсаас орогнол хүсэж, тийшээ амьдрахаар явжээ. Ийм ч учраас арав гаран жилийн амьдын там шиг амьдралаас нь аварч гэрэл гэгээтэй амьдралд хүргэж өгсөн Монголын цөл, монгол хилчдийг байнга дурсах дуртай гэлээ. Тэр одоо Английн Манчестерт нөхөр, гурван хүүхдийн хамт амьдарч байна.