АНУ-ын коллежийн оюутнуудын дунд сексийн зан үйлийн шинэ хандлага дэлгэрсэн нь аюулын харанга дэлдэж буйг эмч, мэргэжилтнүүд анхааруулж эхэллээ. Залуу оюутнууд сексээс авах таашаалыг нэмэгдүүлэхийн тулд “honey packets” гэгч зөгийн балны бэлдмэл хэрэглэх болжээ. Хэдийгээр энэ бүтээгдэхүүн нь цэвэр байгалийн гаралтай ч эрүүл мэндэд онц аюултай нөлөө үзүүлж байна. Хүнсний зориулалттай бүтээгдэхүүн ийн эрэлттэй болсон шалтгаан нь сексийн үед бэлэг эрхтний хөвчрөлтийг дэмжиж, бэлгийн үйл ажиллагааг сайжруулах үйлчилгээтэй гэнэ. Харамсалтай нь, дээрх бүтээгдэхүүнийг хэрэглэсэн коллежийн эрэгтэй оюутнууд эмнэлэгт хандаж, тусламж авах нь сүүлийн үед огцом нэмэгджээ.

“USA Today”-гийнхэн энэ талаар сурважилж, мэргэжлийн хүмүүсийн зөвлөгөөг хүргэжээ. Лабораторийн шинжилгээгээр “honey packets” бэлдмэлд Циализ, Виагра зэрэг эрэгтэйчүүдийн бэлэг эрхтний хөвчрөлт, бэлгийн үйл ажиллагааг дэмждэг хэд хэдэн эмийн найрлага агуулагддагийг тогтоосон байна. Ийм үйлчилгээтэй, маш хүчтэй эм хэрэглэснээр даралт ихсэх, цээжээр хатгуулах, хараа муудах зэрэг гаж нөлөө илэрч зарим тохиолдолд зүрхний шигдээс болдог гэнэ. Гэтэл яг ижил нөлөөтэй зөгийн балны бэлдмэлийг эм гэж үзэж, хэрэглээнд хязгаарлалт тогтоосон улс орон дэлхий дээр байдаггүй учир дурын хүн хүссэн үедээ авч хэрэглэх боломжтой нь эрсдэл дагуулж байна. Мөн энэ төрлийн мэдээлэл маш ховор учир энгийн хүмүүс нарийн учрыг нь мэдэлгүй хэрэглэж, эрүүл мэнд, амь насаараа хохирсоор байна гэж UCLA-гийн профессор Жесси Миллс анхааруулжээ.

Товчоор хэлэхэд, зөгийн бал нь бэлгийн дур хүсэл өдөөгч эмтэй ижил үйлчилгээ үзүүлж, сексийн үед их хэмжээгээр хэрэглэсэн залуу эрэгтэйчүүдийн зүрхэнд хүчтэй нөлөөлж, амь насанд нь аюул учруулах аюултай.